Partidu CASDT sei fó prioridade ba dezenvolvimentu rurál
MANATUTO, 24 abríl 2023 (TATOLI)—Komisáriu Polítika Nasionál Partidu Centro Ação Sosial Demokrático Timorense (CASDT), Norberto Saturnino Rodrigues, hateten karik povu fó fiar ba CASDT atu kaer ukun mak sei fó prioridade ba dezenvolvimentu rurál.
Notísia Relevante: Partidu CASDT komprometidu dezenvolve setór agrikutura bainhira hetan fiar hosi povu
“Fornese ba ita-nia povu Estrada, bee-moos no saneamentu, eskola, klínika, médika, asesu ba merkadu no eletrisidade. Setór privadu sei sai hanesan fonte prinsipál ba kresimentu rendimentu no empregu iha área rurál sira Timor-Leste,” Komisáriu CASDT ne’e hateten ba Agência Tatoli liuhosi telefónika, segunda ne’e.
Aleinde ne’e, nia dehan, ba dezenvolvimentu indústria iha Timor-Leste mak halo identifikasaun rejionál hodi dezenvolve indústria petrolíferu, minerál, agrikultura, peska, alimentar, manufaktura, turizmu, komersiál no indústria kreativu hodi kontribui ba aumenta diviza iha rai-laran iha enkuadramentu organizasionál hanesan ASEAN, CPLP no Ázia Pasifiku.
“Nune’e, identifika no dezenvolve ita-nia rekursu ne’ebé iha potensiál boot atu haburas ekonómia azul (Blue Economy) hodi kontribui ba ita-nia ekonómia nasionál,” nia hateten.
CASDT mós sei kria padraun infraestrutura ba instituisaun defeza no seguransa integradu ho multi desportu, PNTL no F-FDTL sei ativu foti papél la’ós hapara de’it konflitu maibé prevensaun ba konflitu.
PNTL no F-FDTL sei iha kapasidade hodi envolve másimu iha Nasaun Unida ba atividade harii pás nia introdús servisu militár obrigatóriu hanesan meiu atu hadi’ak orden no dixiplina sosiál hodi valoriza eroi no veteran, atu tane aas nafatin interrese no soberania nasionál.
Aleinde ne’e, CASDT mós tau prioridade ba área turizmu nian mak
identifika no prezerva rekursu turizmu iha rai-laran hodi kontribui ba ekonómia lokál no nasionál.
CASDT sei insentiva produtu no empreza nasionál atu kontribui ba kresimentu ekonómiku sustentável no diversifika ekonómia iha tempu mediu no tempu naruk.
“Dezenvolve setór estratéjiku iha enkuadramentu rejionál hodi masimiza empregu kualifikadu nasionál ba turizmu internu no promove mão de obra kualifikadu iha turizmu internasional,” nia dehan.
Jornalista : Osória Marques
Editór : Cancio Ximenes
