iklan

ATAÚRO, MUNISÍPIU, SEGURANSA

PNTL Ataúru prontu oferese seguransa durante periódu kampaña no Eleisaun

PNTL  Ataúru prontu oferese seguransa durante periódu kampaña no Eleisaun

Komandante Polísia Nasionál Timor-Leste (PNTL), munisípiu Ataúru, Superintendente Asistente, Eduardo Campos (Imagem Tatoli/José Belarmino De Sa)

DILI, 24 abríl 2023 (TATOLI) – Komandante Polísia Nasionál Timor-Leste (PNTL), munisípiu Ataúru, Superintendente Asistente, Eduardo Campos informa, PNTL Munisípiu Ataúru, prontu oferese seguransa másimu hodi asegura kampaña Partidu polítiku no Eleisaun Parlamentár tinan 2023 iha Munisípiu Ataúru.

“Ita hatene katak tuir oráriu Komisaun Nasionál Eleisaun (CNE) nian, partidu polítiku sira sei inísia kampaña partidu polítiku iha loron tersa feira dia 25 fulan abríl no Eleisaun Parlamentár iha dia 21 fulan maiu 2023. PNTL munisípiu Ataúru preparadu ona hodi asegura seguransa iha períodu importante sira ne’e, ba festa demokrásia nian,” Superintendente Asistente, Eduardo Campos ba Tatoli iha nia kna’ar fatin, eskuadra PNTL munisípiu Ataúru, suku Mau meta, segunda ohin.

Tuir Komandante Campos, daudaun ne’e dezafiu ne’ebé PNTL munisípiu Ataúru hasoru maka hanesan menus rekusu umanu no ekipamentu hodi halo operasaun. “Oras ne’e PNTL munisípiu Ataúru iha de’it totál membru komandu PNTL hamutuk 17, kompostu husi mane 16 no feto ida”.

“Ami iha de’it veíkulu rua kompostu husi kareta operasionál ida no mós karreta komandante nian ida.  No motorizada operasionál iha hitu hodi bele halo patrullamentu iha munisípiu Ataúru laran,’’ nia relata.

Haree ba kondisaun ne’ebé maka PNTL Munisípiu Ataúru enfrenta, Komandante ne’e hakle’an katak, PNTL munisípiu Ataúru hala’o ona enkontru ho reprezentate Partidu polítiku, autoridade lokál munisípiu, membru relijiozu, veteranu, no  autoridade lokál hanesan xefe suku, xefe aldeia no seluktan, hodi bele serbisu hamutuk kontribui ba seguransa iha périodu kampaña polítika no Eleisaun Parlamentár.

“Ami halo ona enkontru hodi bele koopera malu iha períodu kampaña partidu polítiku no eleisaun parlamentár nian iha Ataúru ba tinan ida ne’e’’ Campos informa

Autoridade polisiál munisípiu Ataúru ne’e haktuir, daudaun ne’e Membru Polisía sira hahú halo ona operasaun no sei kontinua halo seguransa iha área Ataúru tomak durante períodu importante.

“Ami hala’o ona operasaun iha parte importante balun, hodi asegura grupu joven sira labele hemu lanu no hamosu distribuisaun. Membru PNTL mós sei akompaña hotu partidu polítiku sira ne’ebé sei hala’o kampaña iha munisípiu Ataúru,” Campos esplika

Komandante ne’e husu ba komunidade hotu ne’ebé utiliza motorizada atu labele viola regra, tenke uza kapasete no labele hemu lanu, tanba bele risku bo’ot ba ema-nia vida.

Entretantu, tuir regra no sansaun ne’ebé aplika ona husi Nasionál to’o munisípiu katak: Uza Kanu Resin selu $120, la Monta chapa matríkula selu $60, 3, sim laiha selu $45, la Monta Espellu selu $45, La uza kapasete selu $30, la lori dokumentu orijinál selu $30, lori fotokopia dokumentu de’it mós selu $30 nafatin, kontra orden autoridade polísia selu $45, kontra sinál tránzitu, selu $ 45, para iha zebra cross leten selu $60 no ikus liu mak karta kondusaun la tuir kategoria selu $120.

 

Jornalista       : José Belarmino de Sá

Editora           : Nelia Borges

iklan
iklan

Leave a Reply

iklan
error: Content is protected !!