AINARO, 24 abríl 2023 (TATOLI) – Sekretariadu Tékniku Administrasaun Eleitorál (STAE) munisípiu Ainaro rejista husi janeiru too marsu tinan ne’e totál eleitór foun hamutuk 1.441 ne’ebé elejível atu partisipa iha eleisaun parlamentár, iha loron 21 fulan maiu.
“Hahú husi janeiru to’o marsu ami rejista hamutuk 2.962 eleitór, husi númeru ne’e 1.521 atualiza baze de dadus no 1.441 eleitór foun. Sira ne’e mak elejível atu ezerse sira nia direitu iha eleisaun parlamentár tinan ne’e”, Diretór STAE munisípiu Ainaro, Francisco Bianco, informa ba jornalista sira, iha Ainaro Vila, segunda ne’e.
Kestiona kona-bá materiál sensitivu sira ba eleisaun nian, dirijente ne’e informa, STAE Ainaro prepara ona kaixa kabina votu hamutuk 477 no urna hamutuk 227, maibé sei falta 112 ne’ebé oras ne’e daudaun STAE nasionál sei prepara no iha tempu badak sei distribui mai iha Ainaro.
Francisco Bianco relata munisípiu Ainaro estabelese ona sentru votasaun 90, husi númeru ne’e STAE Ainaro identifika ona sentru votasaun 32 ne’ebé lokaliza iha postu administrativu Maubisse, Hatu-Udu, Hato-builico no Ainaro la asesu ba estrada no enerjia elétrika.
Nia dehan, STAE Ainaro koordena ona ho autoridade no Diresaun Obras Públika munisipál atu solusiona difikuldade hirak ne’e atu fasilita trasnporta materiál sensitivu iha loron eleisaun.
Tuir dadus, STAE rejista eleitór hamutuk 890.145, kompostu hosi rai-laran 878.345 no rai-li’ur 11.800.
Eleitór hosi munisípiu Aileu hamutuk 34.962, Ainaro 47.912, Ataúro 7.598, Baucau 99.158, Bobonaro 72.537, Covalima 49.299, Dili 187.462, Ermera 85.358, Lautém 49.435, Liquiçá 53.084, Manatuto 36.547, Manufahi 42.136, Viqueque 58.566 no Rejiaun Administrativa Espesiál Oé-cusse-Ambeno (RAEOA) 54.291.
Notísia relevante: STAE rejista eleitór elejível 890.145
Jornalista: Afonso do Rosário
Editora: Isaura Lemos de Deus
