iklan

LAUTÉM, MUNISÍPIU

CNRT sei prioritiza desentralizasaun – podér lokál iha munisípiu Lautém

CNRT sei prioritiza desentralizasaun – podér lokál iha munisípiu Lautém

Kampana Partidu CNRT iha Munisípiu Lautém (Imagem Tatoli/Camilo de Sousa)

LOSPALOS, 25 abríl 2023 ( TATOLI)– Prezidente Partidu  Conselho Nacional Reconstrução Timorense (CNRT), Xanana Gusmão, hateten  sei  fó prioridade ba desentralizasaun  podér lokál iha Munisípiu Lautém.

“Karik povu Lautém fó fiar  CNRT hodi kaer ukun, CNRT sei prioridade ba desentralizasaun,  podér lokál bazea ba pormérito tuir  ida -idak nia kapasidade, hodi halais  burokrasia ba servisu efikásia  no  efisiénsia  hodi dezenvolve Munisípiu Lautém,” Prezidente Partidu CNRT, Xanana Gusmão ba militante no dimpatizante partidu CNRT, iha kampaña ne’ebé realiza iha kampu futebol Eis Asrama  745 Lospalos, Poihoro, tersa ne’e.

Prezidente Partidu ne’e haktuir katak atu dezenvolve nasaun  ida ne’e presiza ema matenek, tanba ne’e bainhira CNRT manan ba ukun sei uza ema nia matenek bazea ba méritu.

“Lospalos oan ne’ebé envolve san iha partidu CNRT, barak mak matenek, tanba ne’e, karik CNRT ba ukun sei akumula sira hodi dezenvolve densentralizasaun, podér local,” Xanana Hateten.

Líderansa Partidu ne’e hatutan implementasaun programa desentralizasaun no podér lokál ne’e hodi fornese prestasaun servisu públiku ne’ebé lalais no iha kualidade husi autoridade lokál ba povu  Lautém, alende ida ne’e promove partisipasaun komunidade iha prosesu  dezenvolvimentu lokál no promove governu elektróniku iha territóriu nasionál inklui munisípiu Lautém.

Aleinde programa desentralizasaun no podér lokál,  CNRT mós sei implementa programa prioridade ba dezenvolvimentu nasionál mak hanesan: Edukasaun no Saúde inkluzivs, kualidade, Dignifika Veteranu sira, Promove inkluzaun sosiál, Kria Kampu Serbisu ba foinsa’e sira, Promove produtividade no diversifikasaun ekonómika, Promove investimentu setór privadu, Harii indústria pertólifera iha rai-laran, infraestrutura bázika, Hakbesik servisu públiku ba povu, Haburas dezenvolvimentu rurál, Reforma setór Justisa, Hametin pás no estabilidade, Konsolida polítika esterna no programa relevante sira seluk.

“Ho programa prioridade sira ne’e, CNRT husu ba povu Lautém, hili CNRT ho númeru sorteiu 12 iha 21 maiu atu, nune’e iha lejitimidade hodi kaer ukun atu  bele hadi’a povu nia moris husi mukit no ki’ak iha Timor– Leste,” Xanana hateten.

Entretantu, kampaña partidu CNRT ne’e, hetan observasaun másimu husi Komisaun Nasionál Eleisaun (CNE, sigla portugés) no hetan seguransa másimu husi Polísia Nasionál Timor – Leste (PNTL) Munisípiu Lautém inklui Falintíl Forsa Defeza Timor – Leste ( F-FDTL).

 

Jornalista: Camilio de Sousa

Editora.  : Nelia Borges

iklan
iklan

Leave a Reply

iklan
error: Content is protected !!