DILI, 25 abríl 2023 (TATOLI)—Deputadu hosi bankada Congresso Nacional de Reconstrução Timorense (CNRT), Marcos Xavier, husu Governu presiza kontrola komunidade balun ne’ebé faan sasan besik tasi ibun harii baraka to’o ikus mai sai falu uma mea parede iha Tasi-Tolu.
Notísia Relevante: Hasai Okupante Tasi Tolu, La Viola Direitu Umanu
“Liga ho kampaña parlametár ne’ebé hahú iha 19 abríl, ha’u haree iha Tasi-Tolu ita-nia komunidade sira-ne’ebé faan sasán iha tasi ibun sira-ne’e, primeiru sira halo de’it baraka oan, maibé agora sira komesa halo ona uma mea parede,” Deputadu Marcos Xavier levanta kestaun ne’e liuhosi reuniaun plenária PN, tersa ne’e.
Kestaun ida-ne’e, nia husu ba Prezidente Autoridade Munisípiu Dili ho Ministéiru Administrasaun Estatál (MAE) atu kontrola sidadaun sira-ne’ebé hela iha Dili, liuliu komunidade ne’ebé hela iha Tasi-Tolu ne’ebá ne’e.
Aleinde ne’e, nia dehan, iha tasi ibun área ótel Arbiru Beach nian uluk iha uma rua ka tolu de’it, maibé agora iha tasi ibun ne’e komesa nakonu ho uma.
“Hanoin Governu tenke toma atensaun ba ida-ne’e, se lae komunidade ba halo netik baraka oan, depois Governu la ba hasee, entaun sira halo uma ne’ebé di’ak ba sira atu hela metin iha ne’eba,” nia hateten.
Iha reuniaun plenária, Deputada hosi bankada KHUNTO, Olinda Guterres, levanta mós asuntu lixu iha kapitál Dili, liu-liu loja xineza sira-ne’ebé prodús kuantidade lixu barak, nune’e husu atu sira prepara transporte hodi lori ba soe iha lixeira Tibar, nune’e husu Governu atu haree hodi kontrola ida-ne’e.
Deputadu CNRT, Domingos Lemos, kontinua hato’o preokupasaun sistema estalebesimentu faan pulsa eletrisidade iha fatin haat ka lima iha Gleno-munisípiu Ermera ladi’ak, nune’e komunidade hotu-hotu mai sosa iha Dili.
“Buat simples, parte EDTL presiza hadi’a,” nia dehan.
Entretantu, reuniaun plenária ne’e Deputadu sira mós foti preokupasaun iha periódu kampaña eleitorál kondisaun estrada iha territóriu oinsá husu Governu atu hadi’a.
Iha reuniaun plenária ne’e Ministru ba Asuntu Parlamentár no Komunikasaun Sosiál (MAPKOMS), la marka prezensa maibé tékniku sira rejista hela preokupasaun sira hotu atu relata ba minsitériu kompetente.
Jornalista : Nelson de Sousa
Editór : Cancio Ximenes
