DILI, 25 abríl 2023 (TATOLI)—Deputadu hosi bankada FRETILIN, José Paicheco, preokupa Deputadu balun auzente iha reuniaun plenária tersa ne’e tamba partisipa atividade kampaña eleitorál.
“Agora tama iha kampaña no dalabarak iha Parlamentu ida-ne’e Deputadu sira sempre ko’alia ami reprezenta povu maibé ita haree ba lejislatura dalimak ne’e nia mandatu seidauk ramata. Maibé, ita haree iha plenária, kadeira sira-ne’e sempre mamuk hela,” Deputadu Fretilin ne’e hato’o liuhosi reuniaun plenária PN, tersa ne’e.
Nia hateten, presiza korum deliberativa hodi deside tempu tomak ba kampaña ka semana ida dala ida hodi realiza reuniaun plenária maibé ne’e mós korum la prienxe.
“Entaun, ita tenke ativu ita-nia kna’ar hanesan Deputadu iha loron segunda no tersa (tuir reuniaun plenária), maibé ita haree iha semana rua nia laran ne’e Deputadu sira-nia fatin mamuk hela ona,” nia preokupa.
Nia hateten, Deputadu nia kna’ar rasik la halo kadeira mamuk maibé Deputadu sira-nia saláriu kontinua simu normál no lahetan ko’a, tan ne’e husu públiku atu observa took pontu sira-ne’e.
“Tanba ne’e, aproveita hodi hato’o ba públiku hodi halo observasaun ba funsionamentu órgaun ida-ne’e ninian no liga mós pontu kampaña sira,” nia dehan.
Deputadu Fretilin, Antoninho Bianco, fó hanoin ba órgaun soberanu mandatu foun seidauk simu pose signifika órgaun sira hanesan Parlamentu Nasionál nia devér atu hala’o serbisu no hasai desizaun, nune’e mandatu seidauk termina no nafatin kumpre dever konstituisionál.
Enkuantu, iha loron 24 abríl 2023 ne’e, PN la konsege realiza reuniaun plenária tanba korum funsionamentu prienxe tarde.
“Ohin segunda, tuir loloos iha plenária ne’ebé realiza maibé Deputadu sira agora iha terrenu kampaña eleitorál, ho nune’e ohin korum funsionamentu iha prienxe maibé tarde tiha kuaze tuku 11h00 tiha mak foin prienxe korum funsionamentu. Ho nune’e, mak Prezidente Parlamentu deklara hodi informa ensera de’it plenária. Bankada Governu mai kompletu no bankada opozisaun mai la kompletu,” Vise Prezidente Parlamentu Nasionál, Maria Angelina Sarmento hateten ba jornalista sira iha PN, segunda (24/04).
Tanba oras liu ona, korum prienxe atrazu nune’e labele realiza reuniaun plenária.
Vise PN ne’e hateten presiza Deputadu sira aprova rezolusaun ida propoin hosi Prezidente Parlamentu Nasionál atu semana ida pelumenus realiza reuniaun plenária dala ida durante loron 30 períodu kampaña eleitorál, maibé ne’e presiza korum deliberativu 43 alias dois terços.
Tanba ne’e, bainhira seidauk aprova rezolusaun ne’e mak reuniaun plenária kontinua lao normal semana ida dala rua iha segunda no tersa-feira.
Entertantu, tuir observasaun jornalista Tatoli iha reuniaun plenária, tersa ne’e, Deputadu hosi bankada CNRT mak nia kadeira maiória mamuk, Deputadu hosi bankada PD mós iha balun, bankada Fretilin maiória mai no balun mak nia fatin ka kadeira mamuk no hosi PLP ho KHUNTO mós hanesan.
Reuniaun plenária ne’e dirije hosi Prezidente Parlamentu Nasionál, Aniceto Longuinhos Guterres Lopes.
Jornalista : Nelson de Sousa
Editór : Cancio Ximenes
