MALIANA, 25 abríl 2023 (TATOLI)-Bispu Dioseze Maliana, Dom Norberto do Amaral, tersa ne’e fó ordenasaun diakonál ba Frater na’in-haat.
Frater na’in-haat ne’e komposta hosi Júlio do Carmo hosi Parókia Suai, Zacarias Amarál Soares hosi estasaun misionáriu Cailaco, Mouzinho Madeira hosi Parókia Santa Cruz Maliana no Frater Manuél de Jesus José hosi Parókia Salele Tilomar, munisípiu Covalima.
Serimónia ordenasaun ne’e hala’o iha salaun Pro-Katedrál Maliana, munisípiu Bobonaro, iha ámbitu selebrasaun ezisténsia Dioseze Maliana ba dala-13 no aniversáriu Igreza Parókia Santa Cruz Maliana nia ezisténsia hanesan uma-kreda ba dala-50.
Bispu Dioseze Maliana, Dom Norberto do Amarál, husu ba diákonu na’in-haat hala’o knaar ho simplisidade, prudénsia no haraik-aan ba ema hotu.
Prezidente Konferénsia Episkopál Timorense CET, sigla portugés) ne’e agradese ba família ne’ebé ho laran luak entrega sira nia-oan atu halo vokasaun Maromak nian hodi serbí Igreja no sarani sira iha dioseze Maliana.
“Ohin ita fó ordenasaun ba diákonu nain-haat ne’e, tuir loloos na’in-lima, ida tán Padre Pedro Canísio iha hela rai-li’ur, agora atu ordena iha dia 29 juñu,” Bispu Dioseze Maliana ne’e esplika.
Padre Paroókia Santa Cruz Maliana, Valerio Gusmão, parabenzia diákonu na’in-haat ne’ebé hakarak la’o-tuir dalan Maromak nian.
“Imi-nia mehi atu sai nai-lulik nia rohan mak sai ona ohin loron ne’e, liuliu promesa sira-ne’ebé imi halo ona tempu ho tarde sentidu iha fulan neen nia laran, depois formalmente sei tama ba iha ordenasau nai-lulik nia,” Padre Valerio akresenta.
Reprezentamte família diákonu na’in-haat, Lúcio Gomes, sente kointente no agradese ba Bispu Dioseze Maliana, tanba prepara sira urante tinan 12 to’o ohin loron hili no fó ona ordenasaun ba sira.
“Hau lori família bo’o frater nain-haat entrega ba ita-boot hodi sai hanesan aman, sai hanesan nai-ulun, sai hanesan Igreza nian atubele uza sira tuir ita-boot nia hakarak, ami mós oferese sira tuir Jesus nia hakarak,” reprezentante família agradese.
Partisipa iha serimónia ne’e, Administradór Interdiosezianu Dioseze Baucau, Padre Alípio, membru Parlamentu Nasionál, eis titulár, Sekretariu autoridade munisípiu Bobonaro, João de Fátima do Carmo, autoridade sivíl, militár no sarani sira hosi Dioseze Dili, Baucau no Dioseze Maliana.
Jornalista: Sergio da Cruz
Editór: Evaristo Soares Martins
