DILI, 25 abríl 2023 (TATOLI) – Partidu Frente Revolucionário de Timor-Leste Independente (FRETILIN) promete sei tau atensaun espésial ba Munisípiu Ataúru, bainhira hetan fiar hodi kaer ukun iha périodu tinan lima mai.
Sekretáriu jerál (Sekjer) partidu FRETILIN, Marí Alkatiri hato’o promesa ne’e iha kampaña polítika ne’ebé realiza iha suku Maun Meta, Munisípiu Ataúro, tersa ne’e.
“Ataúru nu’udar munisípiu ida ne’ebé iha poténsia rekursu barak tanba ne’e presiza tau atensaun espesiál. Ha’u sei la mai ukun munisípiu Ataúru maibé foka hodi tau atensaun iha setór importante sira hodi dezenvolve munisípiu ataúru atu povu bele moris ho dignu. Tanba ne’e, karik povu Ataúru fó fiar ba FRETILIN atu kaer ukun iha periódu tinan lima oin mai, sei tau atensaun espesiál ba munisípiu Ataúru,” Alkatiri ba militante no simpatizante Partidu Fretilin iha Kampu Futebol, Suku Maumeta, Munisípiu Ataúru, ohin.
Atu garantia povu Ataúru moris ho dignu, FRETILIN sei foka hodi investe iha bee moos, Eletrisidade no Estrada.
“Ita presiza tau programa, sistema bee sai prioridade, maibé ita rekoñese katak problema ne’ebé komunidade Ataúru enfrenta mak hanesan bee moos, eletrisidade no estrada. Ita mós hatene katak oras ne’e governu prevee ona orsamentu hamutuk 13 USD miliaun hodi hadi’a programa importante sira hotu. Tanba ne’e FRETILIN sei kontinua prioritiza ba programa importante sira ne’e hotu,” Sekjer Marí Alkatiri garante.
Iha fatin hanesan, Sekjer Partidu ne’e mós apela ba militante no simpatizante sira iha Munisípiu Ataúro kontinua tau importánsia ba unidade nasionál hodi bele hadi’a dezenvolvimentu.
“Ita presiza tau importánsia ba unidade nasionál hodi bele hadi’a dezenvolvimentu husi aldeia to’o nasionál, hodi foka ba fraternidade umana, hodi tau ema hotu iha dignidade hanesan,” Alkatiri apela.
Ikus liu, líder partidu polítiku ho númeru sorteiu 11 iha Eleisaun Parlamentár 2023 ne’e garante katak liuhusi Plataforma ne’ebé estabelese ona entre partidu tolu hanesa FRETILIN, PLP no KHUNTO, sei asegura FRETILIN kaer ukun hodi hadi’a povu nia moris.
Kampaña Partidu FRETILIN ohin partisipa husi militante no simpatizante hamutuk 500 resin kompostu husi suku lima iha Munisípiu Ataúro, maka hanesan Suku Maunmeta vila, Beloi, Makili, Bikeli no Makadade.
Jornalista :José Barmino De Sá
Editora : Nelia Borges
