AILEU, 25 abríl 2023 (TATOLI) – Diretór Komisaun Justisa Pás Arkidioseze Metropolitana Dílí, Padre Démetrio da Conçeição, husu ba povu Aileu kontinua hatudu maturidade hodi kontribui ba estabilidade durante kampaña no eleisaun.
“Aileu oan sira tomak, atu nafatin sai ema ne’ebé hadomi ba pás, munisípiu ba pás no povu ba pás no unidade”, Padre Démetrio da Conceição dehan bainhira halo intervensaun iha abertura semináriu loron ida ho tema Unidade iha Diversidade ne’ebé halao iha salaun Timor Klaran, tersa ne’e.
Nia dehan, semináriu ho objetivu atu husu komunidade matein pás no estabilidade durante períodu kampaña no eleisaun parlamentár.
“Ita nian festa demókrasia besik dadaun ona, agora dadaun ita tama ona ba iha prosesu kampaña eleitorál no la kleur tama ba eleisaun, buat ida ne’ebé sai preokupasaun no responsablidade ema hotu nian mak estabilidade, unidade no pás iha ita idak idak nian fatin”, Démetrio da Conçeição adianta.
Tuir Amo Démetro, pás ne’e la’os hatudu de’it iha aujénsia funu, maibe pás mós hatudu liuhosi interdependénsia ba malu, katak ita sempre presiza malu, apoia malu no tulun malu.
“Ita iha diferénsia maibé ita kontinua unidade nia-laran”, nia dehan.
Iha fatin hanesan, Viagariu Jerál Pároku Munisípiu Aileu Padre Geovannio Mello de Sousa, louva maturidade povu Aileu, tanba kontribui duni pás no estabilidade.
“Ha’u pesoalmente louva povu iha Munisípiu Aileu, durante ha’u tinan sia ona iha ne’e, halo kna’ar hanesan nai lulik iha fatin ne’e, hanesan Vigariu Jerál no mós Amo Pároku iha Parokia Remexio, ha’u haree povu Aileu moris iha situasaun diverjénsia-nia laran maibé sira konstribui ba pás no estabilidade”, nia dehan.
“Husu ita bo’ot sira atu kontinua mantein unidade no kontinua kuda unidade ne’e ba iha idak idak nia aan atu garante estabilidade iha festa demokrasia ne’e”, Padre Geovannio Mello enkoraja.
Adjuntu Administradór Munisípiu Aileu, Feliz Maria de Oliveira ne’ebé reprezenta Administradór Aileu hodi loke semináriu, sente kontente ho insiativa igreja nia liuhosi Komisaun Justisa Pás Metropolitana Dílí tanba bele organiza semináriu.
“Ha’u lori administradór nia naran kongratula Komisaun Justisa Pás Metropolitana Dílí tanba halo semináriu ida ho tema Unidade iha Diversidade. Ida ne’e importante tebes atu fó hanoin ba ita-nia komunidade sira atu oinsá kontinua hatudu maduru iha prosesu demókratiku ne’ebé la’o hodi kontrui ba pás no estabilidade”, nia kongratula.
Sidadaun hotu iha obrigasaun tenke kontribui ba pás
Komandante Munisípiu Aileu, Superintendente Polísia Ludgerio Picancio Madeira Lay, hateten hanesan autoriedade seguransa husu entidade sira hotu iha Munisípiu Aileu atu kontinua mantein situasaun ne’ebé hakmatek iha períodu festa demókrasia ne’e.
“Husu ba hotu entidade hotu Organizasaun Arte Marsiál no Organizzasaun Rituál iha ne’e hamutuk ho komunidade sira kontinua kontribui ba pás no estabilidade atu ita-nia festa demokrasia bele la’o susesu”, nia dehan.
Nune’e mós, Prezidente Komisaun Reguladora Arte Marsiál (KRAM) Fernando António da Costa “Ato Lekinawa”, husu ba Grupu Arte Marsiál no Grupu Arte Rituál iha munusípiu atu kontribui ba pás, atu Governu labele hanoin atu taka tán atividade arte marsiál.
“Mai ita hamutuk, kuidadu espásu ida ne’e, atu Govermu labele taka tán atividade arte marsiál”, nia afirma.
Jornalista: Natalino Costa
Editór : Zezito Silva
