AILEU, 25 abríl 2023 (TATOLI) – Prezidente Partidu Demokrata Cristão (PDC), Francisco de Araujo, hateten PDC bainhira povu fó fiar iha eleisaun mak sei halo dekretu-lei hodi define folin kafé molok investór sira esporta ba nasaun seluk.
“Ohin ami halo ami-nia mini kampaña iha Suku Seloi Kraik, Postu Administrativu Aileu Vila Munisípiu Aileu, iha biban ne’e, ami koalia kona-ba setór turizmu no ekonómia tanba ita hatene katak kafé ne’e importante. PDC nia hakarak ba oin ne’e ita mak tenke regula sira (investór) halo dekretu- lei ida, kuandu sira mai sosa ita-nian kafé, folin ne’e ita mak tenke fó ba sira atu sira mak bele tetu no hola tuir buat ne’ebé ita iha”, Francisco de Araujo hateten ba Agência TATOLI, tersa ne’e.
Nia esplika, produsaun kafé hosi Munisípiu Ermera, Aileu no Ainaro ne’e produsaun barak liu mak kafé, maibé dala barak nia presu, emprezáriu internasionál mak manipula.
”Tanba ne’e, atu evita ida ne’e mak ita halo ona dekretu-lei atu regula ida ne’e”, Francisco de Araujo subliña.
Prezidente PDC ne’e mós kompromete katak Seloi nudar fatin ba turizmu komunitáriu, karik PDC mak ukun sei dezenvove Seloi di’ak, sai fatin turizmu komunitáriu, hadia infrastrutura, tau fasilidade adekuadu, bee, eletrisidade, harii restaurante bele akomoda estranjeiru sira no hadia estrada ba fatin ne’e, atu ema estrajeiru bele atrativu hodi bele ba vizita fatin ne’e.
“Sé bele fatin turizmu komunitáriu ne’e fó ba xefe suku haree no kontrola no jere, kuandu tama fatin ne’e tenke selu hodi kontribui ba reseita Estadu”, nia afirma.
Prezidente PDC, Francisco de Araujo sei moderniza setór agrikultura iha Seloi, tanba fatin nudar poténsia ba natar maske produsaun mínimu, fasilita agrikultór sira makina ida halo kolleita nian, kuda no mós halo produsaun, nune’e sira bele hasae produsaun.
Tuir oráriu ne’ebé CNE aprova, PDC iha tersa ne’e (25/4) halo mini kampaña iha Suku Seloi Kraik, Postu Administrativu Aileu Vila, Munisípiu Aileu.
Jornalista: Natalino Costa
Editór : Zezito Silva
