DILI, 25 abríl 2023 (TATOLI)—Prezidente Repúblika (PR), José Ramos Horta, isegunda (24 abríl 2023), inaugura pre-eskolár International School Santa Bakhita iha munisípiu Manufahi no hetan bensaun hosi Arsebispu Arkidioseze Metropolitana Dili, Dom Virgílio Kardeal do Carmo da Silva.
“Edukasuan hahú kedas hosi pré-primáriu, iha Timor-Leste 60% kosok-oan, tinan tolu to’o tinan lima, la ba ensinu pré eskolár tama ho idade tinan lima (5) no tinan hitu (7) tan, bainhura ita ba ensinu primáriu labarik sira preparadu loos ona,”’PR Horta hateten liuhosi komunikadu ne’ebé Agência Tatoli asesu, tersa ne’e.
Prezidente Repúblika hateten, sei aprezenta ba Governu foun medida kombate sub-nutrisaun liu-hosi kriasaun pré-eskolar.
“Tinan liu ba ne’e, serbisu hamutuk ho espesialista balun ho apoiu hosi UNICEF prepara proposta ida atu entrega ba Governu foun, nune’e haree programa Pré-Escolar atu kombate mós sub-nutrisaun. Katak, bainhira inan rasik laiha saúde, bainhira labarik moris, laiha inan nia susu-been no la fó inan nia susu-been. Inan nia susu-been mós tenke liu ho ijéne. Ijéne inan nian rasik, ijéne iha uma laran,” Xefe Estadu ne’e hateten.
Horta hateten, presiza promove nafatin kampaña susu-been inan nian, hodi ajuda kombate sub-nutrisaun.
“Kampaña boot tenke halo ba ijéne, iha Timor-Leste tomak. Kampaña boot ba breastfeeding mai hosi husi inan. Pelumenus, fulan-neen hemu de’it inan nia susu-been. Fulan neen liu tiha, bele kahor ho buat seluk. Tuir rekomendasaun hosi espesialista sira, tinan tolu tenke ba ona Pre-Escolar, ne’e mak baze ba future,” nia hateten.
Konstrusaun eskola ne’e, bazeia ba pedidu hosi Prezidente Repúblika ba fundasaun Better hosi Austrália hodi harii eskola ida ho kualidade, ho kurríkulu nasionál hanesan baze no Austrália nian hodi hanorin estudante na’in-50 ho lian tetun, inglés no portugés.
“Iha ne’e, la bolu pré-primáriu, bolu fundasaun, kuandu sira to’o ona elementár, kualidade loos ona tanba hatene ona tetun, portugés no inglés. Kunadu, hahú primáriu depois to’o sekundáriu, ba oin sei halo negosiasaun ho igreja para aumenta, sei halo mobilizasaun finansiamentu iha li’ur para loke iha fatin seluk,” nia dehan.
Tuir planu, Xefe Estadu sei ba Austrália iha fulan outubru tinan ne’e, hodi halo angariasaun ba kriasaun iha Timor-Leste hodi garante eskola ba labarik no joven sira-nia futuru ho kualidade.
Jornalista : Nelson de Sousa
Editór : Cancio Ximenes
