DILI, 25 abríl 2023 (TATOLI) – Eskola Bázika haat iha munisípiu Ermera hetan estraga totál tanba kauza hosi rai halai ne’ebé akontese iha fulan-marsu liubá, dehan Diretór Servisu Edukasaun Munisípiu Ermera, Eduardo Martins.
Resposavel ne’e relata katak dadus hosi eskola haat ne’ebé hetan destruisaun ne’e submete ona ba Ministériu Edukasaun atubele foti desizaun imediata.
“Eskola sira ne’e mak Eskola Bázika Sentrál Dukurai no Bobo-lete no Eskola Bázika Filiál rua iha postu administrativu Hatulia B, iha suku Fatubessi. Ami hato’o ona kondisaun eskola haat ne’ebé rai sobu ona mai nasionál. Ami haree katak kondisaun eskola haat ne’e tenke konstroi foun, maibé presiza buka fali fatin seluk tanba rai antes harii eskola haat ne’e naksobu hotu ona”, dehan Eduardo Martins ba Tatoli iha edifísiu MEJD Vila Verde, tersa ne’e.
Nia informa katak eskola haat ne’ebé rai sobu ne’e, sira identifika ona rai ida ba eskola Dukurai no bainhira ministériu hakarak konstroi eskola foun bele halo filafali iha parte Dukurai Kraik.
“Terrenu ne’ebé ami identifika ona ba eskola EBC Dukurai ne’e seguru duni atu harii fali eskola foun, tanba rai ne’e tetuk. Maibé ba eskola tolu seluk maka sei iha hela prosesu identifikasaun terrenu tanba to’o agora ekipa Servisu Munisipál halo hela serbisu atu buka fatin ne’ebé seguru hodi harii fali eskola foun ba alunu sira”, nia afirma.
Eskola haat ne’ebé hetan estraga totál ne’e, EBC Dukurai lakon edifísiu tolu ho sala de aula 12, EBC Bobo-lete iha edifísiu eskola rua ho sala ualu no EBF rua iha postu administrativu Hatulia B ne’e lakon edifísiu haat ho sala aula 12.
Nia esplika eskola haat ne’e latama iha apoiu emerjénsia, maibé tenke halo planu ida hodi bele prevee fali orsamentu atu nune’e bele harii filafali. “Tanba eskola haat ne’e ninia aliserse mós laiha hotu ona, estudante sira besik atus 3 dezde marsu partisipa prosesu aprendizajen iha de’it fasilidade emerjénsia”.
Iha sorin seluk, Diretór Nasionál Asaun Sosiál Eskolár Ministériu Edukasaun Juventude no Desportu (DNASE-MEJD), Joaquim Martin, hatete DNASE nia obrigasaun mak haree liubá eskola sira ne’ebé maka ninia gravidade ne’e normál, maibé tama ona iha grave totál ne’e tenke tau iha planu ministériu nian depois prevee orsamentu.
“Ami ninia responsabilidade ba apoiu emerjénsia ba eskola sira ne’ebé maka hetan estraga kaman hanesan anin sobu kalén ka sala ida mak hetan estraga de’it ne’e ami bele apoiu, maibé kuandu maka’as hanesan ne’e, responsabilidade Diresaun Infraestrutura MEJD nian maka hatene”, nia realsa.
Jornalista: Tomé Amado
Editora: Maria Auxiliadora
