AINARO, 25 abril 2023 (TATOLI) – Sekretariadu Tékniku Administrasaun Eleitorál (STAE) munisípiu Ainaro realiza edukasaun votante ba eleitór sira iha suku Soro, postu administrativu Ainaro Vila, munisípiu Ainaro.
Tuir Pontu Vokál STAE postu administrativu Ainaro Vila, Alfredo Pereira, edukasaun votante ne’e ho objetivu atu hanorin eleitór foun no mos ferik-katuas sira atu vota ho lolos bainhira ezerse sira nia direitu votu iha eleisaun parlamentár fulan oin.
“Edukasaun votante ne’e atu fó esklaresimentu ba komunidade kona-ba vota ho lolos, atu nune’e iha loron eleisaun sira bele ezerse direitu hodi deside Estadu no Governu ida ne’e nia destinu, se lae orsida sira ba vota fali ida ne’e no vota fali ida ne’ebá hodi estraga votu”, Alfredo Pereira informa iha suku Soro, tersa ne’e.
Dirijente husu ba populasaun sira bainhira iha loron eleisaun lebele lori telemóvel hodi hasai buletin votu hodi publika iha rede sosiál.
Nia esplika iha loron eleisaun, STAE ho elementu Polísia Nasionál Timor-Leste (PNTL) sei halo pasa revista ba eleitór sira ne’ebé forma iha liña hodi halo identifikasaun ba kartaun eleitorál, sasan kro’at no sei la permite lori telemóvel hodi hasai boletin votu.
Xefe Suku Soro, Miguel Perreira de Araújo, konsidera atividade ne’e bele hanorin populasaun sira atu hatene didi’ak kona-ba oinsá atu ezerse direitu votu ho di’ak iha loron eleisaun.
“Komunidade sira presiza hatene did’iak molok ba tuir votasaun hodi hili líder ida ne’ebé di’ak hodi serví rai doben ida ne’e nomos ba povu tomak iha Timor-Leste”, nia apela.
Líder komunitáriu ne’e husu ba PNTL atu halo seguransa másimu iha loron eleisaun hodi kontrola no halo atuasaun bainhira ema ruma lori tudik, katana, inklui lanu atu nune’e bele prevene krime sira ne’ebé bele akontese iha fatin votasaun.
Notísia relevante: Tékniku STAE Covalima sei elabora oráriu ba edukasaun vontante
Jornalista: Afonso do Rosário
Editora: Isaura Lemos de Deus
