Top

Turiscai: Instalasaun ba eletrifikasaun iha suku lima konklui no ida iha faze konkursu

Jornaljsta Tatoli Hortencio Sanchez, entrevista hela ho Administradór Posto Administrativu Turiscai, Adriano da Costa/ imajen: Lopes

MANUFAHI, 25 abríl 2023 (TATOLI) – Administradór Postu Administrativu Turiscai, Munisípiu Manufahi Adriano da Costa, informa iha Postu Turiscai iha suku 11 maibé suku lima konklui ona prosesu instalasaun ba eletrifikasaun no hein de’it inagurasaun no suku hela de’it suku ida mak sei iha prosesu konkursu públiku.

“Prosesu eletrisidade iha Turiscai kuaze populasaun hamutuk 95% mak asesu ona ba eletrisidade, tanba iha Turiscai, suku hamutuk 11, suku lima ahi lakan permanente ona, suku lima dadaun ne’e instala hotu ona, hein de’it inagurasaun no Suku Fatukalu mak tama hela iha konkursu, maske suku ida ne’ebé izoladu tebes”, Administradór dehan ba Agência TATOLI, iha Same-Vila, ohin.

Iha parte seluk, nia konfesa, kona-ba infrastrutura, hanesan dalan ne’ebé ligasaun hosi Same-Vila ba Turiscai mak seidauk di’ak maibé ladún aat, ne’ebé ladú afeta ba movimentasaun transporte kada loron.

“Estrada ladun di’ak maibé movimentasaun transporte públiku sira iha hela, tanba iha Turiscai mós Suku 11 ne’e asesu hotu ba Uman Naroman ba Povu (UNP), materiál sira, kareta tula tama ba mai di’ak hela no prosesu konstrusaun besik finaliza ona, ha’u nia suku 11 ne’e Uma Naroman ba Povu ne’e hamutuk 100-resin mais buat hotu la’o di’ak no la falla”, administradór subliña.

Totál sSuku iha Postu Turiscai hamutuk 11 no aldeia hamutuk 40, suku hirak ne’e mak hanesan Mindelo, Aitemua, Manu-Mera, Kaimauk, Lesuati, Fatukalu, Beremana, Liurai, Matorek, Foholau no Orana ho nia populasaun hamutuk 9000-resin ne’ebé maioria moris ho vida agrikultura.

Jornalista: Hortencio Sanchez

Editór : Zezito Silva

Publisidade

Leave a Reply

Latest Post

error: Content is protected !!