Dioseze Baucau sei koordena ho Bispu foun molok ordenasaun episkopál
BAUCAU, 26 abríl 2023 (TATOLI) – Dioseze Baucau sei halo koordenasaun ho bispu foun, Padre Leandro Maria Alves kona-ba loron ordenasaun episkopál no toma pose.
Administradór Diosezanu Dioseze Baucau, Padre Alípio Pinto Gusmão, esplika, ba oin sei enkontru hodi estabelese komisaun inklui rona hanoin hosi Bispu eleitu kona-ba loron ordenasaun episkopál ne’ebé normalmente presiza fulan-tolu.
“Ba oin ita sei harii komisaun, liuliu atu oinsá preparasaun ba ordenasaun episkopál no toma pose nian,” Administradór Diosezanu Dioseze Baucau hateten iha Salaun São José Vila antiga, kuarta ne’e.
Administradór Dioseze Baucau seidauk fó sai loron fixu tanba sei iha koordenasaun ho Bispu foun, Padre Leandro Maria kona-ba preparasaun ruma molok hakat ba ordenasaun episkopál no toma pose.
Eis padre Parókia Manatuto ne’e sente kontente tanba durante ne’e sarani Dioseze Baucau hein liuhosi orasaun tanba importante liu mak dioseze ida nia na’in mak Bispu, enkuantu administradór administra de’it.
Maske karta ofisiál hosi Santa Sé seidauk to’o mai Timor-Leste maibé notifikasaun ne’ebé fó-sai katak, Papa Francisco nomea ona Padre Leandro Maria Alves nu’udar segundu Bispu Dioseze Baucau nian.
“Maske Nai-lulik ne’e hosi arkedioseze Dili maibé nia sei sai bispu Baucau nune’e sei realiza iha Baucau ” Padre Alipio Gusmão akresenta.
Prosesu kleur tanba razaun pendemia Covid-19 nune’e empata komisaun atu konvoka reuniaun hodi eleitu Bisipu foun ba Dioseze, barak inklui Dioseze Baucau tanba ne’e iha tiha tinan-2022 mak halo desizaun.
Padre Alipio Gusmão hato’o mensajen ba sarani iha Dioseze Baucau atu kontinua reza ba bispu foun no buka kolabora hahú hosi saserdotál, relijioslza no reliziozu inklui sarani sira hotu apoia knaar bispu nian tanba Dioseze Baucau presiza duni bispu ne’ebé forte.
Notísia relevante: Dioseze Baucau agradese desizaun Vatikanu ba Bispu foun
Jornalista : Natalino Belo
Editór : Evaristo Soares Martins
