Espesialista husi Austrália konkluidu konsulta labarik ho problema soe foer boot
DILI, 26 abríl 2023 (TATOLI) – Diretór Klíniku Hospitál Nasionál Guido Valadares (HNGV), Marcelino Correia, dehan espesialista sirurjia no pediatria husi Austrália, remata ona konsulta ba labarik sira ne’ebé ho problema so’e foer boot hamutuk 54 iha HNGV.
“Durante semana rua nia-laran, sira apoiu ita halo operasaun ba labarik sira ne’ebé mak problema ho so’e foer boot, entaun sira remata ona no fila ona ba Austrália maibé sira lori mós labarik sira nia amsotra hodi analiza ba patolojia iha Austrália atu haree nia moras ne’e depois hotu tiha mak lori rezultadu mai hodi sira halo fila fali operasaun daruak nian”, Marcelino Correia dehan ba jornalista sira iha nia kna’ar fatin, ohin.
Nia informa, ekipa médika sirurjia no pediatria sei fila fali mai halo operasaun ba labarik sira ne’ebé mak probelma ho so’e foer boot iha fulan jullu no agostu.
“Sira mai fila fali ne’e ba operasaun segundu nian ba labarik sira ne’ebé mak problema ho soe foer boot sira”, nia esplika.
Nia afirma, labarik sira ne’ebé mak ho problema tee sai husi kabun sorin ne’e ho idade tinan hitu mai kraik mak mai konsulta ho médiku espesialista sira husi Austrália.
“Médiku espesialista sirurjia no pediatria husi Austrália ne’e iha doutór operasaun nai’n ida, anestesia ida no enfermeiru na’in tolu mak durante semana rua halo atendimentu ba labarik sira ne’ebé ho problema tee sai husi kabun sorin”, nia konklui.
Jornalista : Felicidade Ximenes
Editór : Zezito Silva
