MANUFAHI, 26 abríl 2023 (TATOLI) – Administradór Postu Administrativu Fatuberlihu Munisípiu Manufahi Gil Teofilho Amaral, informa estrada ligasaun hosi Same-Vila ba Postu Fatuberlihu ho kondisaun grave tebes, tanba ne’e husu Governu tenke foti lalais medida hodi hadia atu bele fasilita komunidade sira lori produtu ba merkadu.
“Prosesu dezenvolvimentu iha Fatuberlihu la’o maibé ami preokupa los mak Estrada, agora daudaun tempu udan entaun afeta tebes ba kondisaun estrada aat los, ha’u hanesan autoriedade ha’u nafatin rekomenda ba Ministériu kompetente atu foti medida lais, atu nune’e antes tama ba fulan maiu bele hadia ona”, Administradór dehan ne’e ba Agência TATOLI iha Same-Vila, ohin.
Nia dehan, maioria komunidade iha Fatuberlihu moris ho agrikultura no sempre lori produtu lokál ba fan iha merkadu iha Same-Vila maibé tanba difikuldade ho estrada impede komunidade sira atu lori sira nia sasan ba merkadu.
“Ita-nia komunidade sira araska tebes atu lori produtu ba merkadu tanba de’it dalan ne’e, liuhosi media ne’e ha’u fiar ministériu kompotente bele haree no halo atendimentu lais, proposta barak mak ami hato’o ona ba nasionál maibé seidauk responde”, nia dehan.
Nia konta, diresaun Same-Vila ba Fatuberlihu dalan kuandu di’ak halai kuaze oras ida de’it maibé ho kondisaun dalan ne’ebé la di’ak bele halai to’o oras rua ba to’o oras tolu.
Totál suku iha Postu Fatuberlihu hamutuk lima no aldeia 23 hosi númeru suku hirak ne’e tolu mak asesu ona ba eletrisidade no suku rua mak daudaun ne’e iha faze instalasaun.
“Kona-ba eletrisidade ami agradese tebes ba Governu ida ne’e tanba eletrisidade kuaze tama hotu ona, iha suku lima maibé suku tolu ahi tama hotu ona, suku rua mak agora daudaun iha faze instalasaun hein halo koneksaun ahi lakan hotu ona”, nia relata.
Suku lima iha Fatuberlihu ne’e mak hanesan Fatukahe, Kaikasa, Klakuk, Fahinehan no Bubususu ho populasaun hamutuk rihun11-resin.
Jornalista: Hortencio Sanchez
Editór : Zezito Silva
