DILI, 26 abríl 2023 (TATOLI)—Governu liuhosi reuniaun Konsellu Ministru delibera ona atu aprova projetu ne’ebé aprezenta hosi Ministru Defeza ein ezersísiu, Fidelis Leite Magalhães, ba realizasaun prosedimentu esesionál rekrutamentu militár espesiál na’in-87 iha maiu 2023.
“Númeru ida-ne’e fahe militár na’in-29 ba Kuartél Jenerál, na’in-10 ba Komponente Terrestre, 12 ba Komponente Navál, na’in-neen ba Komponente Aérea Lijeira, na’in-lima ba Sentru Instrusaun Komandante Nicolau Lobato, na’in-18 ba Unidade Apoiu Servisu, na’in-haat ba Unidade Polísia Militár, no na’in-tolu ba Unidade FALINTIL”, Ministru Prezidénsia Konsellu Ministru, Fidelis Leite Magalhães hateten hafoin reuniaun ezekutivu, iha Palásiu Governu kuarta ne’e.
Notísia relevante : Rekrutamentu F-FDTL foun tama ona faze apuramentu
Nia dehan, Governu sei halo inkorporasaun foin-sa’e lisensiadu no mestradu na’in-87 iha área importante sira ne’ebé mak FALINTIL-Forsa Defeza Timor-Leste (F-FDTL) presiza.
“Sira ne’e importante tebes tanba kualifikadu iha área espesífika hanesan enjiñeru IT, Jurista, área saúde, no área seluk,” Ministru akresenta.
Portavós Governu konsidera inisiativa ne’e nu’udar dalan ida atu kontinua kontribui profisionaliza F-FDTL tanba mundu modernu agora ne’e forsa defeza ida presiza iha grau akadémiku iha área espesializada hodi bele kontribui nune’e instituisaun defeza sai hanesan forsa defeza konvensionál no modernu.
Jornalista : Antónia Gusmão
Editora : Julia Chatarina
