Governu aloka millaun $2 ba Manatuto implementa merenda eskolár
MANATUO, 26 abríl 2023 (TATOLI)—Administradór Munisípiu Manatuto, Bernardo Lopes, hateten iha 2023 ne’e Governu aloka osan besik millaun $2 ba munisípiu Manatuto atu implementa merenda eskolar ba estudante hamutuk 18.128.
“Programa boot iha edukasaun nian mak merenda eskolár. Iha tinan ne’e, ami propoin osan besik millaun $2 ba ita-nia oan sira,” Administradór Manatuto ne’e hateten ba Agência Tatoli, iha nia kna’ar fatin, kuarta ne’e.
Administradór informa eskola pre-eskolar públiku hamutuk 28 ba estudante 785, maibé ba eskola pre-eskolar privada hamutuk 16 ho totál estudante 401, pre-eskolar katólika iha eskola 44 ho nia estudante hamutuk 1.176.
“Ba eskola ensinu báziku, ita sura eskola maibé ita sura turma mak eskola ensinu báziku iha Manatuto iha turma 437 ho estudante 11.621. Agora, ba eskola sekundáriu jerál iha turma 39 ho nia estudante hamutuk 1.386. Eskola sekundáriu katólika iha turma 66 ho nia estudante hamutuk 2.759,” nia dehan.
Programa merenda eskolar ba tinan ne’e, nia dehan, hahú ona implementa no daudaun ne’e funsiona hela.
“Ami hahú halo prosesu pagamentu iha fulan-janeiru to’o marsu no iha 01 abríl, eskola hotu-hotu funsiona ona ho merenda eskolar,” nia hateten.
Nia dehan, tinan ne’ebé osan boot mak besik miliaun$2 no kompara tinan kotuk ho montante rihun $800-resin.
Iha suku hotu-hotu munisípiu Manatuto nian ne’e eskola pre-eskolar to’o pre-sekundáriu iha hotu ona no iha tinan 2021 ne’e troka fali edifísu hamutuk 10 hodi troka fali eskola ne’ebé tuan no iha eskola sira-ne’e kompletu ho nia rasik no manorin sira.
“Eskola sira-ne’ebé iha suku sira-ne’e laiha estudante ida mak tuur iha rai no laiha uma emerjénsia,” nia dehan.
Jornalista : Osória Marques
Editór : Cancio Ximenes
