DILI, 26 abril 2023 (TATOLI)– Misaun Observador husi Resistência Nacional dos Estudantes de Timor-Leste (RENETIL) husu Polisia Nasionál Timor-Leste (PNTL) atu bele foti asaun imediatamente hodi bandu no haruka fila labarik sira ne’ebé partisipa iha kampaña husi Partidu Polítiku sira ba Eleisaun Parlamentar tinan 2023.
“Ami haree labarik kiik husi idade sanolu (10) mai kraik mos partisipa iha kampaña no tau farda partidu nian, husu PNTL atu tau matan antes sira atu tama mai kampo tenke haruka fila kedas, labele haruka sira besik,” Reprezentante Missaun Observador RENETIL, João Bercamns Babo dos Santos hato’o iha enkontru Preparasaun Eleisaun iha Edifísiu STAE Liquiça, kuarta ne’e.
João Bercamns Babo dos Santos mós rekoñese inan-aman barak laiha koñesimentu ou informasaun konaba regulamentu refere, presiza atensaun husi parte seguransa tanba prezensa labarik nian perigozu tebes.
Inspetor Xefe Polisia Komandante Operasaun PNTL Munisípiu Liquiça, Delfin da Silva informa inan-aman balun fo razaun ba PNTL katak ho simpatia ba partidu no hakarak atu rona informasaun laiha ema hodi hein labarik sira ne’e iha uma, nune’e tenke lori ba kampaña.
“Sujere ba nasional hodi husik mensajen ba inan aman, agora ita nia preokupasaun mak labarik sira ne’e ita labele hein hotu. Ami sei hare’e iha terenu hodi fo seguransa ba prosesu kampaña, maske ita hanoin tanba lori labaraik mak ho ema barak nune’e bele afeta ba labarik,” nia informa.
Ekipa PNTL rasik mós nota iha terenu, labarik balun tanba hela besik fatin kampaña nian no antuziasmu hare’e ema barak halo movimentu, sira rasik mak ba partisipa sem koñesimentu husi inan aman.
Diretór Komisaun Nasionál ba Eleisaun (CNE -sigla portuges) Munisípiu Liquiça, Celistiano Xavier aumenta preokupasaun sira hato’o ona ba parte nasionál maibé nafatin husu autoridade sira atu bele apoiu halo sosializasaun ba públiku hodi labele lori oan sira ba kampaña.
“Ami informa ona ba nasional no husi Komisaun Direitu Labarik mos sai observador mas ne’e fila ba konsiensia inan aman hodi informa ba oan sira atu labele partisipa iha kampaña,” nia esplika.
Jornalista : Cidalia Fátima
Editora : Armandina Moniz
