KHUNTO sei hadi’a estrada bainhira manán iha eleisaun parlamentár
BAUCAU, 26 abríl 2023 (TATOLI) – Partidu Kmanek Haburas Unidade Nasionál Timor Oan (KHUNTO) liuhosi kampaña komísiu iha munisípiu Baucau kompromete sei hadi’a estrada tanba konsidera importante sai konetividade ba komunidade.
Prezidente Partidu KHUNTO, Armanda Berta dos Santos, esplika, planu hotu trasa ona iha livru programa la sees hosi Planu Estratéjiku Dezenvolvimentu Nasionál, ne’ebé durante ne’e sai matadalan ba prosesu konstrusaun estadu nune’e KHUNTO sei halo mudansa bainhira povu fó fiar iha eleisaun parlamentár tinan-ne’e.
“Iha loron-21 fulan-maiu bainhira povu fo fiar dala-ida tan ba partidu KHUNTO iha IX governu konstitusionál sei hadi’a di’ak liután estrada, bee-moos ba komunidade sira,” Prezidente Partidu KHUNTO hateten iha kampu Darsula, suku Gariuai, kuarta ne’e.
Alende estrada, programa seluk ne’ebé inportante mak hanesan saúde, edukasaun, dezenvolvimentu ekonomia, kultura, veteranu no infraestrutura bázika.
Vise primeira-ministra ne’e, argumenta, maske durante ukun iha VIII governu konstitusionál hasoru dezafiu hanesan impase polítiku, inundasaun no pandemia Covid-19 maibé governu implementa subsídiu ba kada família hodi ajuda povu iha situasaun krize.
“Ita hotuhotu nia hamutuk la’os ba individu balun de’it tanba ne’e oituan ka barak povu tenke sente hotu,” Armanda Berta akresenta.
Armanda Berta, enkoraja joven sira atu matan moris neon-na’in tanba konsidera joven mak futuru nasaun nune’e labele lakon oportunidade, liuliu apoia ba partidu liuliu kria unidade nasionál.
Partidu KHUNTO realiza kampaña komísiu iha Baucau partisipa hosi Konselleiru Másimu Partidu KHUNTO, José dos Santos Naimori Bucar, estrutura partidu nasionál, munisípiu Baucau, militante hosi postu admistrativu neen no hetan seguransa masimu hosi Polísia Nasionál Timor-Leste (PNTL), FALINTIL-FDTL no hetan observasaun hosi ofisiál supervizaun hosi Komisaun Nasionál Eleisaun (CNE, sigla portugés).
Jornalista : Natalino Belo
Editór : Evaristo Soares Martins
