ERMERA, 25 abríl 2023 (TATOLI) – Partidu Dezenvolvimento Nacional (PDN) kompromete sei estabelese Fundu Kafé hodi hadi’a kafeikultór sira- nia moris liu-liu iha Munisípiu Ermera.
“Osan husi Fundu Petroleu ne’e ita sei aloka mós ba Fundu Kafé para kafekultór sira bele foti osan ne’e hodi hadi’a sira-nia produsaun kafé, hodi hasa’e kafé folin,” Prezidente (PDN), Lucas Soares Coli Bere ba Tatoli hafoin hala’o kampaña polítika, iha Suku Catrai Leten, Postu Administrativu Letefoho, Munisípiu Ermera, tersa ne’e.
Líder másimu PDN ne’e husu ba populasaun Ermera laran tomak atu vota ba PDN hodi aloka osan husi Fundu Petróleu ba Fundu Kafé atu nune’e populasaun Ermera tomak bele benefísia husi fundu ne’e.
Nia haktuir, kafé nia folin tenke sa’e, tanba kafé xikra ida iha nasaun seluk entre $5, $7 no $10: “Maibé kafé iha Timor-Leste ne’e folin sei menus husi $1,”
“Pelu menus, kafé kilu ida ne’e $5 ou $7 dolar atu kafekultór sira bele sustenta sira-nia moris. Kafé ne’e, tinan ida ita kolleta dala ida, entaun nia folin ne’e tenke sa’e para sira bele muda sira-nia moris, hanesan haruka oan ba eskola to’o universidade para fila mai dezenvolve sira-nia-an no ajuda inan-aman,” Prezidente ne’e esplika.
Coli Bere esplika, alende kafé, Ermera mós iha poténsia barak inklui turizmu istóriku hanesan Líder Karismátiku kay Rala Xanana Gusmão nia subar fatin.
“Fatin sira ne’e sai poténsia turizmu para atrai turista sira mai. Turista sira mai ne’e hakarak haree ita-nia natureza hanesan bee manas Atsabe, Mota Bandeira no seluktan. Turista sira la’ós mai pra haree uma andár 100. Tanba turista ida mai Ermera ho osan $2,000 ka 3,000, nia hakarak han mak produtu lokál, no hemu kafé Ermera,” Nia hateten.
Kampaña dialógu refere realiza husi Estrutura nasionál PDN, inklui Prezidente no Sekretáriu Jerál.
Iha kampaña ne’e, ekipa hato’o mós program prinsipál PDN nian ba militante no simpatezante liu 100 resin iha suku refere.
Program hirak ne’e mak hanesan: Edukasaun (mellora kapasitásaun ba manorin sira, mellora dezenvolvimentu siénsia teknolojia, melloramentu kualidade eskola tékniku vokasionál; Turizmu istóriku no kultura, turizmu relijiozu, komunitária no ekolójiku); Infraestrutura (Kompleta Estrada no ponte nasionais, melloramentu Estrada no ponte rurais); Dezenvolvimentu Rurál; Juventude (Estabelese fundu ba joven sira, estabelese asosiasaun joven no rehabilita infraestrutura desportiva); Kultura (Estabelese Sentru Kulturál Rejionál, Implementa Lei patrimónia kulturál, promove atividade kulturál no seluktan).
Tuir órariu kampaña eleitorál, kampaña dahuluk PDN nian iha munisípiu Ermera realiza iha Suku Manusae, Postu Administrativu Hatulia A, maibé tanba kondisaun dalan ne’ebé ladi’ak, kampaña refere la konsege realiza.
Hafoin kampaña refere, Estrutura Nasionál PDN mós estabelese kedas estrutura juventude PDN Letefoho no Suku Katrai Leten.
Jornalista : Filomeno Martins
Editora : Nelia Borges
