DILI, 26 abríl 2023 (TATOLI)–Ministru Justisa, Tiago Amaral Sarmento, hateten, regulamentu Organizasaun Internasionál Aviausaun Sivíl (ICAO, sigla inglés) permite sidadaun sira bele utiliza pasaporte eletróniku Timor-Leste ne’ebé inválidu hodi halo viajen ba nasaun membru ICAO.
“Validasaun prorogasaun ne’e lei internasionál permite tanba Estadu Timor-Leste sai membru ba ICAO, ne’ebé permite atu aplika ba pasaporte inválidu bele nafatin valida ho notária nia autorizasaun no informasaun ne’e sei tama sistema internasionál iha aeroportu hotu. Ida-ne’e buat ne’ebé aplika normál iha mundu, ne’e bazeia ba regulamentu ICAO katak nasaun hotu sai membru, ne’e buat normál ida maibé tanba Timor-Leste foin aplika entaun ema hakfodak no politiza tiha,” Ministru informa iha Palásiu Governu, kuarta ne’e.
Nia dehan, ho meiu ne’e bele asegura timor-oan nia viajen hosi estranjeiru tama mai nune’e mós hosi rai-laran bá li’ur tanba ninia karimbu ne’e sei mosu iha sistema internasionál sira iha aeroportu ne’ebé de’it, eseptu pasaporte sira ne’ebé mate tinan-lima ona, maibé hela de’it fulan-neen ka tinan-ida.
“Karimbu iha ona no Ministériu Justisa koordena ona ho Ministériu Negósiu Estranjeiru no Kooperasaun hodi fó hatene ba país hotu ne’ebé ita ba,” nia akresenta.
Notísia relevante : Governu deside prorrogasaun estraordináriu ba prazu validade pasaporte eletróniku Timor-Leste
Konsellu Ministru foin lalais aprova projetu dekretu-lei, ne’ebé aprezenta hosi Ministru Justisa, Tiago Amaral Sarmento, ne’ebé ho hakarak atu halo prorrogasaun estraordináriu ba prazu validade pasaporte eletróniku Timor-Leste nian.
Maski iha esforsu atu hetan kadernu nesesáriu atu emite pasaporte eletróniku Timor-Leste maibé fatór barak mak impede realizasaun. Hosi motivu ida-ne’e maka Konsellu Ministru deside atu prorroga validade pasaporte eletróniku ne’ebé kaduka durante períodu dekretu-lei ne’e tama iha vigór, to’o loron 06 maiu 2024, hosi kedas bainhira iha pájina disponível.
Jornalista : Antónia Gusmão
Editora : Julia Chatarina
