DILI, 26 abril 2023 (TATOLI)– Diretór Komisaun Nasionál ba Eleisaun (CNE -sigla portuges) Munisípiu Liquiça, Celestiano Xavier hateten durante semana dahuluk kampaña ba Eleisaun Parlamentar tinan 2023, Munisípiu Liquiça seidauk rejistu keixa ou preokupasaun ruma husi públiku.
“Ami apresia ba partidu polítiku sira ne’ebé prontu kordena nune’e ita lao ho diak. Ohin ita loron ualu ona kampaña, ami CNE rasik seidauk iha keixa ka reklamasaun konaba hatun bandeira, ataka ou insulta malu no seluk tan,” Celestiano Xavier dehan liu husi nia intervensaun iha enkontru preparasaun ElPar, STAE Liquiça.
Maske nune’e nia rekoñese, Parpol balun laiha kordenasaun no komunikasaun iha terenu bainhira atu halo mudansa orariu hodi difikulta servisu observador sira nian.
“Sira nia orariu loron lima antes tenke hato’o mai CNE, maibé balun halo mini kampaña la informa mai ami. Orariu mudansa tenke liga mai CNE atu hatene laos hato’o ba media dehan laiha prezensa seguransa no observador sira. Alende ne’e ba PNTL rasik tenke fo tratamentu hanesan ba atividade kampaña hotu, labele ba deit partidu balun,” nia afirma.
Diretór ne’e nafatin husu ba Parpol sira atu nafatin mantein estabilidade tanba sira nia prezensa hodi hato’o programa para konvense eleitor sira. Alende ne’e tenke mantein ambiente ne’ebé durante kampaña tanba fatin ne’ebé utiliza hanesan patrimoniu Liquiça nian hodi asegura hamutuk.
Inspetor Xefe Polisia Komandante Operasaun PNTL Munisípiu Liquiça, Delfin da Silva informa durante semana ida nia laran Parpol hotu kopera ho diak maibé iha atividade Partido Socialista Timorense (PST), Kordenador la konsege mantein kordenasaun.
“Ita labele binga malu, kordenador PST ami buka la hetan mais kalan ne’e kolia fali ba media dehan ami la halo observasaun no fo seguransa,” Delfin dehan.
Inspetor ne’e mos apela ba Xefe Suku sira tenke informa ba parte kompetente sira bainhira Parpol sira halo kampaña la tuir orariu no laiha informasaun nune’e hanesan meius hodi asegura komunidade.
Iha fatin hanesan, Administradór Munisípiu Liquiça, Pedro Paulo Gomes husu ba PNTL no CNE tenke hapara imediatamente kampaña bainhira observa Parpol nia atividade kampaña nakonu ho liafuan insulta malu hodi soran fali militante ka komunidade sira ne’ebé partisipa.
“Parpol sira tenke hato’o programa laos para atu hatun malu no insulta malu. Tenke respeita ema seluk nia dignidade. Hau mos husu observador no PNTL iha ne’e atu hare’a bainhira parpol sira mak insulta tenke hapara kedas, tanba ne’e distribui informasaun laloos ba média ida ne’e soran fali ladiak. CNE ho observador sira tenke hare’e, demokrasia laos atu trata malu,” Pedro Paulo afirma.
Administradór Munisípiu Liquiça nafatin fo hanoin ba eleitor hamutuk 53,084 munisípiu Liquiça partense husi Postu Administrativu tolu, no Suku 23 atu bele ezerse sira nia direitu liu husi votasaun ba ElPar 2023 ne’ebé sei akontese iha 21 maiu 2023.
Jornalista : Cidalia Fátima
Editora : Armandina Moniz
