SIMILIE relata serbisu iha área teknolójia ba PR
DILI, 26 abríl 2023 (TATOLI)—Prezidente Repúblika (PR), José Ramos Horta, kuarta ne’e, simu audiénsia hosi empreza nasionál SIMILIE ne’ebé durante ne’e nia serbisu foka ba área teknolójia.
“SIMILIE nu’udar empreza sosiál ne’ebé estabelese iha Timor-Leste iha 2016, ami harii ho hanoin ida atu fornese teknolójia sustentavél ne’ebé la depende de’it ba ezisténsia hosi projetu maibé bele iha kontinuasaun. Ne’ebé, ami-nia objetivu ohin loron mai hasoru Prezidente primeiru atu introdús ami-nia kompañia no serbisu ne’ebé mak halo ona iha Timor-Leste,” Jenerál Manajer Kompañia SIMILIE, Ana Paula da Costa Xavier, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, Dili.
Nia hatutan, serbisu teknolójia ne’ebé durante hala’o haree liga ba mudansa klimátika, tanba mudansa klimátika sai hanesan asuntu global, no serbisu barak ne’ebé empreza ne’e hala’o foka ba fornese solusaun sustentavél atu responde ba impaktu mudansa klimátika.
“Ba parte mudansa klimátika teknolójia ne’ebé ami iha (sistema teknolójia) kolleta dadus atu bele haree oinsá mak dadus klima nian ita iha no kompara ho dadus ne’ebé nia impaktu ba iha bee no klima ne’e rasik,” nia dehan.
Nia hato’o mós ba PR kona-ba sistema teknolójia sira ne’ebé mak durante ne’e empreza dezenvolve no implementa ona iha rai-laran liu-liu sistema alerta sedu ne’ebé daudaun serbisu ho parseiru Governu hanesan dirasaun nasionál meteorolojia jeofísika no autoridade nasionál protesaun sivíl sira utiliza hela.
Dirijente kompañia ne’e hato’o mós ba Xefe Estadu kona-ba planu empreza nian atu estabelese akadémia sei fó oportunidade ba joven timoroan atu hetan formasaun área teknolójia.
“Ami mós dadalia ituan kona-ba inisiativa ida ami lansa iha tinan kotuk bolu Kolmera bale, ne’ebé mak parte hosi inisiativa ne’e ami kompañia hakarak atu estabelese akadémia ida-ne’ebé sei fó oportunidade ba joven timoroan sira liu-liu ba feto atu fó programa formasaun hanesan kodin, data analitics, internet of thinks no seluk tan,” nia hateten.
Durante enkontru, nia dehan, Prezidente Repúblika entuziasmu tebes atu simu sira-nia parte tanba kompañia ne’ebé estabelese iha Timor-Leste no ninia tékniku sira-ne’ebé mak iha mesak joven timoroan, la’ós de’it halo instalasaun maibé dezeña ka dezenvolve ba teknolójia hirak empreza instala iha territóriu laran tomak.
“Prezidente mós hakarak vizita ba ami-nia edifísiu hodi bele haree ami-nia serbisu ne’ebé ami hala’o iha ne’eba no Prezidente hakarak konvida konpañia atu envolve iha feira kona-ba teknolójia ka dijitalizasaun sei hala’o iha fulan-agostu,” nia dehan.
Jornalista : Nelson de Sousa
Editór : Cancio Ximenes
