AINARO, 26 abril 2023 (TATOLI) – Primeiru-Vise Prezidente Partidu União Democrática Timorense (UDT) ho númeru sorteiu 7, João Perreira, afirma partidu iha objetivu definitivu tolu hodi hadia povu nia moris bainhira ka’er ukun.
“Ami iha objetivu prinsipál tolu atu alkansa iha 2023-2028. Objetivu primeiru, UDT hakarak asegura direitu moris di’ak povu nian. Segundu, UDT hakarak assegura fortalesimentu governasaun no terseiru, UDT hakarak fortalese no asegura sivilizasaun Timor nian, haree liu ba kultura, valór tradisionál sira no lisan”, João Perreira informa ba Ajénsia Tatoli, hafoin halo kampaña ho tipu diálogu, iha Aitutu, Lesuhati, postu adiministrativu Maubisse, munisípiu Ainaro, tersa ne’e.
Nia esplika, objetivu primeiru atu asegura direitu moris di’ak povu nian, UDT iha programa atu hadia setór agricultura, liu husi programa siklu agrikulturál, diversifika ekonomia, liu husi harii home industry nune’e Governu bele insentiva joven sira nomos ema ne’ebé dezempregu hodi harii industria ki’ik sira.
Nuné’e, bele sosa produtu agrikultura ho objetivu produz ba ai-han sira hanesan snack hodi faan iha loja no supermerkadu sira atu bele hapara ona produtu importasaun.
“Ami hakarak apoiu setór turizmu, liuhusi insentiva joven sira sai ajente ba turizmu hodi reforsa retornu naun petrolíferu”, nia realsa.
Kestiona kona-ba objetivu segundu, João Perreira responde katak UDT hakarak assegura fortalesimentu governasaun, ne’e iha programa lima: aselera prosesu desentralizasaun, halo reforma administrasaun públika ne’ebé ohin loron politizadu, reforsa boa governasaun, apoia setór justisa no instituisaun independente sira atu halo kontrolu ba servisu Governu ni’an.
Aleinde ne’e, partidu ho númeru sorteiu 7, hakarak apoia inisiativa Ministériu Kooperasaun Negósiu Estranjeiru hodi aselera adezaun Timor-Leste ba Asosiasaun Nasaun Sudeste Aziátiku (ASEAN, sigla inglés), ba Organizasaun Mundiál Komérsiu (OMK), hakarak koopera mos ho organizasaun rejionál sira hanesan CPLP, g7+ no sira seluk.
“UDT hakarak reforsa partisipasaun ativa Timor-Leste ni’an iha fórum internasionál sira, inklui Organizasaun Nasaun Unida”, nia esklarese.
Iha objetivu terseiru, João Perreira hateten “UDT ho lema kaebauk, hakarak apoia nafatin sivilizasaun hanesan maneira moris, dixiplina no étika morál hodi respeita malu. Tanba ne’e ami hakarak kontinua nafatin valor tradisionál bei-ala sira nian, no sei promove programa kona-ba reforsa lisan, eventu kulturál sira hodi atrai turista sira”, nia esplika.
Kestiona kona-ba preferénsia dezenvolvimentu ne’ebé UDT sei implementa iha Maubisse, dirijente ne’e hateten “programa tolu ne’e integradu no hakarak aplika ba munisipiu hotu tanba ami la halo separasaun ba programa”.
Tuir ajenda, UDT sei kontinua halo kampaña ho tipu diálogu iha suku Maulau, postu Aaministrativu Maubisse, unisípiu Ainaro.
Notísia relevante: Partidu UDT kansela atividade kampaña eleitorál iha Covalima
Jornalista: Afonso do Rosário
Editora: Isaura Lemos de Deus
