Autoridade Manatuto husu partidu politika garante pás no estabilidade
MANATUTO, 27 abríl 2023 (TATOLI)—Administradór Munisípiu Manatuto, Bernardo Lopes, husu ba partidu polítika hotu-hotu tenke garante pás no estabilidade iha períodu kampaña eleitorál hasoru eleisaun parlamentár 21 maiu 2023.
Notísia Relevante: Kampaña eleitorál ba Eleisaun Parlamentár sei hahú iha 19 abríl
“Partidu 17 ne’e imi mak lideransa iha imi-nia partidu laran ne’e, tenke garante katak imi sei la kria konflitu iha imi-nia prosesu kampaña eleitorál iha Manatuto. Partidu mai atu fahe programa ba povu, labele mai hamosu fali violasaun iha kampaña para depois enves imi tane imi-nia partidu maibé imi mak hamoe imi-nia partidu,” Autoridade Manatuto ne’e hateten ba Agência Tatoli iha kna’ar fatin, kuarta ne’e.
Tanba, tuir nia, observasaun katak durante ne’e laiha problema maibé tenke mantein no asegura hodi labele hamosu violasaun.
“Ha’u haree partidu kiik ne’ebé halo kampaña ho tipu door-to-door la’o ho di’ak no hakmatek. Maibé, ha’u hanoin ba oin kampaña nafatin matak nafatin no asegura katak kampaña tenke ho programa no planu nian de’it,” nia hateten.
Nia dehan kampaña ne’e sei garante no matak tanba Manatuto iha ekipa serguransa hosi Polísia Nasionál Timor-Leste (PNTL) hamutuk ho Ofisiál Polísia Suku (UPS).
“Maibé ita mós iha ekipa movél hosi F-FDTL. Sira-ne’e sei halo movél iha territóriu Manatuto nian hodi garante seguransa ba sidadaun sira,” nia hateten.
Notísia Relevante: Prezidente Repúblika dekreta loron eleisaun Parlamentár iha 21 maiu
Jornalista : Osória Marques
Editór : Cancio Ximenes
