Autoridade Manatuto sei prepara karreta tula EhD ba fatin votasaun
MANATUTO, 27 abríl 2023 (TATOLI)—Administradór Munisípiu Manatuto, Bernardo Lopes, hateten iha eleisaun lejizlativa 2023 ne’e Autoridade Manatuto sei trata espesiál hodi prepara karreta ba ba Ema ho Defisiénsia (EhD) sira transporta ba fatin votasaun.
“Sira iha tratamentu espesiál ba ma ho defisiénsia ne’e ba sira-ne’ebé ho kondisaun defisiénsia. Autoridade munisipál sei tau meiu ruma iha ne’ebá, primeiru tau kedas karreta ka transporte mak foti sira hosi fatin ne’ebé sira hela depois ba fatin votasaun nian hodi ezerse sira-nia direitu votu,” Administradór Munisípiu Manatuto ne’e hateten ba Agência Tatoli, iha nia kna’ar fatin Manatuto, kuarta ne’e.
Nia hatutan, iha eleisaun parlamentár 2023 ne’e mós autoridade munisipál sei garante ai-han ruma ba Ema ho Defisiénsia (EhD) sira inklui inan isin-rua iha fatin eleisaun nian.
“Tanba sira la’ós ema badinas, nune’e ita presiza prepara ai-han ba sira maibé ba mós oan nurak, inan isin-rua, ferik no katuas sira. Tanba ne’e, ita sei garante ai-han ba sira,” nia hateten.
Tanba ne’e, nia dehan, nia parte halo preparasaun mak dahuluk servisu hamutuk ho Sekretariadu Tékniku Administrasaun Estatál (STAE) no hala’o ona resensiementu eleitorál no atualizasaun baze dadus ne’e ba sidadaun ne’ebé atinje idade17.
Hafoin ne’e, autoriadede ne’e mós kolabora hamutuk ho Komisaun Nasionál Eleisaun (CNE, sigla portug’es) hodi hala’o edukasaun sívika ba eleitór sira. Mesmu halo filafila ona maibé barak sei sala.
“Entaun liuhusi formasaun ida-ne’e ita hakbesik liután ba ita-nia komunidade atu oinsá fó sira-nia votu ne’ebé loos, ho konsiénsia, la manipula hosi ema seluk no la orienta hosi ema seluk,” nia dehan.
Aleinde ne’e, nia informa, administradór munisípiu mós sei prepara transporte hamutuk 21 hodi transporta materiál sensitivu ba destinadu sentru votasaun no estasaun votasaun sira.
“Viatura 21 ne’e, ami hanoin seidauk to’o, entaun ami hato’o karta ba STAE nasionál hodi fasilita tan viatura 10 hanesan ne’e, nune’e bele fasilita no labele difikulta bainhira transporta materiál no viatura sira-ne’e mak ita sei fasilita mós sidadaun ne’ebé ho kondisaun defisiénsia,” nia hateten.
Ba eleisaun parlamentá ne’e, administradór husu ba komunidade hotu-hotu iha suku 31 ne’ebé sei tuir vota katak iha kada tinan tinan lima nu’udar sidadaun ne’ebé di’ak no iha responsabilidade ba nia nasaun no rai ne’e, buat ne’ebé atu kontribui mak fó votu iha eleisaun sira.
“Hodi asegura katak ita-nia nasaun moris no tuu iha demokrásia nia-laran, ita-nia nasaun moris iha liberdade nia-laran, ita-nia nasaun opta demokrásia no tuir prinsipiu polítika iha rai Ázia. Entaun bainhira ema la votu, ne’e signifika nia la hadomi nia rain. Mesmu nasaun Timor-Leste nia eleisaun la’ós obrigatoriamente maibé ita presiza de’it konxiénsia. Ha’u hein katak hotu-hotu sei tuir eleisaun. Ida-ne’e mak ha’u-nia mensajen ba sidadaun hotu-hotu maibé suku 10-resin, ha’u ba direita no informa ona sira,” nia dehan.
Nia dehan, eleisaun lejizlativa ne’e monu iha tempu ne’ebé udan maibé nia garante katak ema hotu sei ezerse nia direitu no autoridade mós prepara ona ekipa karregamentu hodi lalin sasán bainhira udan no dalan la di’ak.
Dadus provizóriu eleitór Manatuto nian kuaze 36.000-resin ne’ebé rejistu to’o iha fulan-fevereiru 2023, no sentru votasaun iha Manatuto hamutuk 83 no estasaun votasaun iha 98.
Jornalista : Osória Marques
Editór : Cancio Ximenes
