AINARO, 27 abril 2023 (TATOLI) – Partidu Centro Ação Social Democrática Timorense (CASDT) defende polítika desentralizasaun administrativa no podér lokál hodi hakbesik dezenvolvimentu ba povu.
Kompromisu ne’e hato’o husi Prezidente partidu CASDT, Isaac do Rosário, ba ajénsia Tatoli, hafoin hala’o mini kampaña iha postu administrativu Maubisse, munisípiu Ainaro, kinta ne’e.
“Desentralizasaun administrativa no podér lokál ne’e importante tebes ba autoridade munisipál sira hodi jere rasik rekursu ne’ebé iha. Bainhira ita atribui podér ne’e ba kada munisípiu hodi jere administrasaun ida ne’e ita hakbesik ona dezenvolvimentu ba povu no roda ekonomia iha baze mos hahú la’o, tanba transferénsia orsamentu ne’ebé aprova iha Parlamentu Nasionál ba kada munisípiu ne’e sirkula de’it iha nível munisipál no bele hasa’e rendimentu ekonomia komunidade sira ni’an”, Isaac do Rosário informa.
Aleinde ne’e, CASDT mos hakarak hakbesik saúde ba povu liu husi estabelese sentru saúde iha kada postu administrativu, bainhira hetan konfiansa husi povu.
“Hakarak ka lakohi ita tenki harii sentru saúde iha kada postu administrativu atu fasilita povu iha baze asesu ba kuidadu médiku, liuliu ba moras sira ne’ebé presiza atendimentu urjente”, nia haktuir.
Líder partidu ho númeru sorteiu 13 ne’e afirma, atu estabelese sentru saúde sira ne’e presiza tau atensaun mós ba rekursu umanu, liuliu halo rekrutamentu ba pesoál médiku hodi halo atendimentu ba pasiente nomós tenki iha ambulánsia atu fasilita transferénsia pasiente sira ba ospitál nasionál.
Iha kampaña eleitorál ne’ebé realiza iha postu administrativu Maubisse, munisípiu Ainaro, CASDT aprezenta programa prinsipál rua ba dezenvolvimentu setór produtivu.
Tuir Isaac do Rosário, Maubisse potensiál ba agrikultura no turizmu, tanba área ne’e nakonu ho produtu lokál no eziste mós sítiu turístiku ne’ebé atrativu.
Nia dehan, postu administrativu Maubisse iha produtu lokál sira hanesan fehuk ropa, koto, repollu no produtu sira seluk, maibé komunidade sira susár atu asesu ba merkadu, tanba estrada ne’ebé grave tebes.
“Iha agrikultura nian, ita presiza hadia infraestrutura bázika hanesan estrada husi suku to’o aldeia atu nune’e povu bele lori sira nia produtu ba merkadu”, nia akresenta.
Isaac do Rosário kompromete bainhira hetan fiar husi povu, sei dezenvolve sítiu turístika hodi atrai vizitante nune’e bele apoia rendimentu família.
Partidu ida ne’e mai ho vizaun no misaun atu aspira povu Timor-Leste sai povu ida ne’ebé modernu no prósperu. CASDT mai ho valór Sosiál Demokrata Timorense ninian, ne’ebé ka’er-metin mak unidade, justisa sosiál no solidariedade. Partidu ida ne’e hakarak povu ida ne’ebé moris di’ak no ho modernidade.
Tuir CASDT, prosperidade ida ne’e liuhusi ema nia konsiénsia no nia asaun rasik para bele hadi’ak nia moris, maibé Estadu tuir valór Sosiál Demokrata Timorense tenke tau-matan para fasilita ema hotu-hotu bele moris ho dignu hodi alkansa mehi ne’ebé hakarak vida prósperu no modernu.
Notísia relevante: CASDT kompromete tau importánsia ba produtu ortikultura iha Aileu
Jornalista: Afonso do Rosário
Editora: Isaura Lemos de Deus
