CNE Manatuto identifika viatura Estadu hasai xápa matríkula iha kampaña KHUNTO
MANATUTO, 27 abríl 2023 (TATOLI)—Diretór Komisaun Nasionál Eleisaun (CNE) munisípiu Manatuto, Paulino Soares, hateten CNE Manatuto identifika viatura Estadu haat (4) ne’ebé balun hasai xapa mátrikula iha kampaña Partidu Kmanek Haburas Unidade Nasionál Timoroan (KHUNTO) iha Manatuto Vila.
“Ita ko’alia kona-ba transporte mós ami identifika karreta Estadu iha haat. Karreta rua iha xapa mátrikula ka plat G no rua seluk plat hasai tiha. Ida-ne’e ami arkiva ona foto. Ohin, ami konfirma kedas maibé karreta sira-ne’e eskoltu mak uza. Ida-ne’e ami konsidera viola regra no ami sei informa nasionál liu-liu parte patrimóniu Estadu no Komisaun Funsaun Públiku mak sei haree asuntu ne’e. Ami nafatin anota no ajusta ba relatóriu CNE nian,” nia dehan ba Agência Tatoli liuhusi telefónika, kinta ne’e.
Nia dehan, CNE Manatuto sei relata direta ba patrimóniu Estadu hodi konfirma no momentu KHUNTO halo kampaña iha Natarbora sábadu (22/04/23) liu ba ne’e mós CNE identifika viatura Estadu ida.
“Iha mementu ne’e mós parte patrimóniu Estadu mós konfirma ho ami kedas tanba sira haree direta hosi televizaun katak iha kampañia KHUNTO nian mós iha karreta Estadu ida maibé ida-ne’e loos duni no ami konfirma karreta ne’e la uza plat maibé Estadu nian,” nia hateten.
Aleinde ne’e, iha kampaña partidu KHUNTO nian ne’e, CNE hamutuk ho Institutu Nasionál Direitu Defeza ba Labarik (INDDICA-sigla portugés) hamutuk Provedória Direitu Umanu no Justisa (PDHJ) observa labarik barak mak tuir kampaña.
“Tuir ami-nia observasaun ba kampañia KHUNTO ohin loron nian hatudu katak KHUNTO mobiliza militante hosi postu neen inklui hosi Manleu Metinaro, munisípiu Dili nian mós mai. Ida-ne’e ami ho ita-nia polísia sira toma ona tanba antes ne’e Polísia avizu katak atu evita problema partidu labele mobiliza nia militante. Aleinde ne’e, ohin iha kampaña ne’e ami haree labarik barak mós tuir kampaña KHUNTO nian no labarik sira-ne’e mós lori hosi Cairui ho Manleuna,” nia dehan.
Jornalista : Osória Marques
Editór : Cancio Ximenes
