CPD-RDTL kolleta batar-forerai ektare rua iha Oé-Cusse

OÉ-CUSSE 27 abríl 2023 (TATOLI) – Diresaun Nasionál Konsellu Populár Defeza, Repúblika Demokrátika Timor-Leste, (CPD-RDTL), hamutuk ho autoridade komunitáriu sira, kinta ne’e, kolleta batar no forerai ektare rua iha kooperativa aldeia Tula-Ika, suku Lifau, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).

Komisáriu Polítika hosi setór 1,  José Martins ‘Teki Liras’, informa, atividade ne’e, hanesan ezemplu ida atu alerta ba komunidade hodi banati tuir, tenke dezenvolve produtu rai laran, liuliu setór produtiva sira iha setór agrikultura, hodi minimiza dependénsia ba produtu importasaun.

“Diresaun Nasionál CPD-RDTL, promove kooperativa ne’e, hanesan dezenvolvimentu reál ida, ba país ida-ne’e, tanba ita-nia Estadu RDTL ne’e, bazea ba agrikultura, tuir diviza nasionál ne’ebé maka hakerek, batar no hare,” José Martins, ko’alia iha serimónia kolleta ne’ebé realiza aiha suku Lifau Oé-Cusse.

Tuir nia,  maske kooperativa ne’e foin hahú ho nia kondisaun simples maibé parte ida atu apoia Estadu no Governu labele tane liman beibeik ba rai seluk, ho asaun ne’ebé halo ona, hatudu ba públiku liuliu Oé-Cusse, katak moris presiza tama to’os no natar halo produsaun, hakiak animál, mak hafoin liga ba Estadu atu fasilita oinsá, bele kria kampu traballu ka iha polítika seluk atu apoia.

“Maibé sekuandu ita la-halo servisu, maibé husu no ezije beibeik ba Estadu, Estadu ba deve iha nasaun seluk, ida-ne’e sei fó impaktu ba jerasaun mai, tán ne’e ohin ami konvida autoridade lokál sira-nia prezensa, atu alerta ba komunidade atu banati tuir ezemplu sira hanesan-ne’e, hodi hamoris ekonomia Timor-Leste nian, mak hahú hosi baze,” nia afirma.

Nia informa, atividade kooperativa ne’e la’ós realiza iha Oé-Cusse de’it, maibé kobre hotu ona ba munisípiu 13, maske seidauk sura ba tonelada, sei kuandtidade de’it maibé konsellu 13 iha munisipíu hotu, implementa ona polítika ne’e hosi CPD-RDTL.

“Ida-ne’e atu eduka povu iha Estadu Timor-Leste atu labele tane liman beibeik hosi rai-li’ur, tanba liuhosi atividade ne’e bele redús importasaun, só buat ne’ebé labele halo mak ita-bele husu apoiu, tanba prioridade liu maka nesesidade bázika, batar, hare, lakeru, tohu, hudi ai-farina, forerai no hahán seluk tán,”  nia katak.

Xefe Suku Lifau, Lazaro Kenat,  agradese no konsidera asaun polítika ne’ebé CPD-RDTL realiza iha suku, hanesan motivasaun ba joven sira oinsá bele servisu iha setór agikultura.

“Atividade ne’ebé ohin CPD-RDTL hala’o ne’e kapaas, tanba ida-ne’e bele fó motivasaun ida ba komunidade, liuliu joven sira, hanesan fanu sira atu halo tuir asaun ne’ebé hala’o daudaun, hanesan kuda produtu lokál iha suku,” nia orgullu.

Jornalista: Abílio Elo Nini

Editór: Evaristo Soares Martins