OÉ-CUSSE 27 abríl 2023 (TATOLI) – Servisu Edukasaun Rejiaun Administrativa Espesiál Oé-Cusse Ambeno (RAEOA), sei harii projetu eskola hamutuk unidade 25 iha tinan 2023 ne’e.
Diretór Edukasaun Oé-Cusse, Daniel Mauno, informa, projetu eskola 25 ne’e fahe ba edifísiu foun no reabilitasaun, ne’ebé propoin ona iha Planu Asaun Anuál (PAA) 2023 nian.
“Ita iha servisu fíziku sira hanesan, edifisíu sira, ita iha planu tinan ida-ne’e 25 projetu, fahe ba konstrusaun foun no reabilitasaun, tanba ne’e tama ona planu antes nian ba tinan ne’e,” Daniel Mauno, hatete iha Oé-Cusse, kinta ne’e.
Tanba halo planu atu harii edifísiu, tanba kada tinan númeru estudante aumenta no sala aprendizajen menus, aleende halo edifísiu foun no halo mós reabilitasaun ba edifísiu sira-ne’ebé presiza atu hadi’a ninia kondisaun, nune’e fó asesu ba ensinu ne’e ba estudante no manorin sira di’ak no dignu.
“Agora parte tékniku hosi diresaun edukasaun servisu hamutuk ho tékniku sira iha diresaun infraestrutura prepara ona BoQ no dezeñu no buat seluk, ne’ebé ita hein de’it bainhira udan-been para ita komesa lansa ba konkursu públiku,” nia katak.
Dirijente Edukasuan Oé-Cusse ne’e, la sita detalla kona-bá montante orsamentu ba projetu 25 ne’e, maibé planu ne’e ajenda ona iha Planu Asaun Anuál (PAA) 2022 no reapropria tinan 2023 ne’e.
“Osan ne’e mai hosi RAEOA la’ós hosi Ministériu Edukasaun, ne’ebé projetu 25 ne’e, ita identifika ona iha fatin sira hotu kobre ba sub-rejiaun haat,” nia katak.
Notísia relevante: Edukasaun Oé-Cusse propoin millaun $1-resin ba programa merenda eskolár
Jornalista: Abílio Elo Nini
Editór: Evaristo Soares Martins
