MANATUTO, 27 abríl 2023 (TATOLI)—Diretór Komisaun Nasionál Eleisaun (CNE, sigla postugés) Munisípiu Manatuto, Paulino Soares, hateten ema deskoñesidu tuda militante Partidu Kmanek Haburas Unidade Nasionál Timoroan (KHUNTO) iha postu Administrativu Laclo bainhira fila hosi atividade kampaña iha Manatuto Vila.
Notísia Relevante: KHUNTO sei fó prioridade ba feto-labarik-joven-Ema ho Defisiénsia
“Militante hosi KHUNTO nian bainhira fila hosi kampaña iha Manatuto Vila ba Laclo mak ema deskoñesidu tuda militante iha karreta laran. Deskonfia militante partidu seluk ne’ebé hein iha Laclo, aldeia Uma Naruk, suku Uma Naruk iha mota Dolok-oan nian mak tula militante KHUNTO nian no iha balun ne’ebé kanek maibé kanek kmaan,” Diretór Komisaun Nasionál Eleisaun (CNE, sigla postugés) Munisípiu Manatuto, Paulino Soares, hateten ba Agência Tatoli, liuhosi telefónika, kinta ne’e.
Nia dehan, akontesimentu tuda malu akontese iha tuku 19h45 kalan, no to’o oras ne’e Polísia Nasionál Timor-Leste (PNTL) kontinua buka tuir ema-ne’ebé tuda militante KHUNTO bainhira fila hosi kampaña iha Manatuto Vila.
Ho akontesementu ne’e, nia dehan, Koordenadór Partidu KHUNTO nian daudaun ne’e hala’o ona keixa ba ekipa CNE iha postu administrativu Laclo nian.
“Aban mak ita ajusta ka preinxe keixa ne’ebé hato’o hosi Koordenadór Manatuto KHUNTO nian, ba formuláriu ne’ebé CNE prepara,” nia hateten.
Jornalista : Osória Marques
EDitór : Cancio Ximenes
