DILI, 27 abríl 2023 (TATOLI)—Xefe Bankada FRETILIN iha Parlamentu Nasionál, Deputadu David Dias Ximenes ‘Mandati’, hateten hakarak debate ho partidu CNRT kona-ba tema fronteira marítima ho Ró Hakslok atu povu esklaresidu, nune’e partidu sira seluk labele aproveita sai hanesan mateira iha kampaña eleitorál.
Notísia Relevante: CNRT laiha tempu debate ho FRETILIN kona-ba fronteira marítima-Ró Haksolok
Mandati hateten, iha tempu kampaña eleitorál balun foti matéria fronteira marítima no Ró Hakslok sai kampaña, maske iha ne’e iha diferensa hanoin no hosi diferensa ne’e povu tomak hatene, ida-ne’e aproveita halo kampaña entaun iha ne’e povu tenke esklaresidu sé mak loos no sala.
“Ho esklaresimentu ne’ebé la loos ne’e ita debate de’it para povu ne’e esklaresidu, ida loos ne’e hosi ne’ebé no sala hosi ne’ebé. Maibé la’ós atu fó sala ba malu, nia mak sala maibé ema labele sala tanbá nia mós iha hanoin. Entaun, saida mak akontese kuandu hetan ona pontu sira sala no loos, entaun ita bele buka ona hanoin hamutuk nian. Ida-ne’e mak la akontese ne’e, ne’e mak sira dehan lakohi debate signifika sira lakohi hetan lia-loos ne’e iha ne’ebé, lia-loos ne’e ita tuur hamutuk ko’alia tiha kedas,” Xefe Bankada FRETILIN ne’e hateten ba jornalista sira iha Parlamentu Nasionál, kinta ne’e.
Tamba ne’e, Mandati la konkorda labele lori fali sai matéria iha kampaña eleitorál no komesa insulta malu.
“Ne’e ha’u-nia postura polítika mak ne’e, tanba ita labele aproveita fali buat ne’ebé loos ita seidauk hatene no la loos moos ita seidauk hatene para depois halo kampaña hodi hafoer malu, ne’e ha’u lakohi ida,” nia hateten.
Mezmu nune’e, Deputadu hosi partidu FRETILIN ne’e hori uluk kedas to’o ohin loron, nia parte seidauk defende debate entre Sekretáriu Jerál partidu FRETILIN ho Prezidente Partidu CNRT, no kontinua defende atu líder nasionál na’in-rua ne’e tuur hamutuk halo diálogu inklui ho líder nasionál sira seluk.
“Tanbasá, ha’u gosta ko’alia kona-ba diálogu ne’e ita ema ida-idak ho nia hanoin. Maibé, ita bele buka óinsa hanoin ida diferensa sira-ne’e tenke iha pontu ida-ne’ebé hanesan, sai interrese nasionál atu ita hala’o,” nia hateten.
Nia dehan, iha eis Prezidente Repúblika, Francisco Guterres ‘Lú-Olo’ nia tempu bolu hotu líder nasionál sira atu ba tuur hamutuk iha meza ida no líder sira hotu partisipa maibé falta de’it mak Xanana Gusmão.
“Tambá ne’e, ha’u nafatin defende no kontinua husu diálogu atu ko’alia ba malu,” nia dehan.
Enretantu, iha loron 25 abríl ne’e, Portavós ba kampaña partidu CNRT, Roberto Soares, fó sai pozisaun partidu CNRT nian hodi deklara katak laiha tempu atu debate ho pedidu hosi partidu FRETILIN atu halo debate kona-ba asuntu fronteira marítima ho Ró Haksolok.
Roberto Soares, hakarak informa mós ba públiku eleitoradu sira katak, bazeia ba karta pedidu husi partidu FRETILIN iha loron 20 fulan abríl tinan 2023 ho númeru referénsia 37/SNCCF/2023, nune’e mós pedidu opiniaun mai husi CNE kona-ba asuntu debate markadu ba loron 22 abríl 2023.
“Prezidente CNRT hato’o hanoin hirak tuir mai, husu deskulpa ba CNE tambá konsidera katak iha períodu kampaña eleitorál partidu CNRT sei laiha tempu ba debate espesifiku kona- ba asuntu fronteria marítimu no Ró Haksolok”, Kordenadór Kampaña Paritu CNRT ne’e hato’o pozisaun partidu nian liu husi konferénsia imprensa ba jornalista sira iha sede partidu CNRT, Bairru dos Grolhos, tersa ne’e.
Nia hatutan, fronteira marítima asina ona husi Governu dahitu iha ONU no mós ratifika ona iha Parlamentu Nasionál no partidu FRETILIN deklara ona ninia votu kontra ba tratadu fronteira marítima ho nia anexu sira.
Nia dehan, molok atu asina no ratifika prosesu fronteira marítima, iha tempu ne’eba Primeiru Ministru, Rui Maria de Araújo, sempre konvoka enkontru altu nível Estadu nian hodi hato’o rezultadu negosiasaun kona-ba fronteira maritima.
“Ró Haksolok la iha ona oportunidade atu diskute tambá prosesu investigasaun lao ona iha CAC ho Ministériu Públiku, tambá ne’e sei la iha debate apropriadu ba
matéria referida, tambá, se lae, ita influénsia opiniaun públika hodi divulga segredu justisa,” nia hateten.
Partidu CNRT konsidera tema debate kona-ba fronteira marítima finaliza tia ona, só falta deit fronteira terrestre ho Indonézia no Ró Haksolok nia prosesu iha Ministériu Públiku
Jornalista : Nelson de Sousa
Editór : Cancio Ximenes
