VIQUEQUE, 27 abríl 2023 (TATOLI)–Sekretáriu Jerál Partidu Fronte Revolusionária Timor-Leste Independente (FRETILIN), Marí Alkatiri, kompremete bainhira povu fó fiar ba ukun tan sei hadi’a sistema edukasaun ba timor-oan sira.
“Ha’u hakarak ita hateke ba oin saida maka ita presiza. Ita presiza ita-nia oan no bei-oan matenek liu ita, presiza iha eskola ho kualidade a’as ba oan no bei-oan sira. Entaun ita tenke hadi’a edukasaun. VIII Governu viabiliza hodi FRETILIN hadi’a daudaun ona, profesór voluntáriu hetan ona kontratu no profesór uluk kontratadu dalan iha ona atu ba permanete maibé tenke liu hosi teste tanba profesór tenke matenek maka hanorin. Bainhira FRETILIN manán ba forma IX Governu maka ita sei loke dalan hodi hadi’a sistema edukasaun ida inkluzivu, sistema edukasaun ho kualidade no sistema edukasaun ne’ebé bele loke kampu serbisu, se la’e ema estuda, estuda maibé sai dezempregu,” Sekretáriu Jerál hateten durante kampaña ho tipu diálogu, iha kampu futeból suku Vessoru, postu administrativu Uatulari, munisípiu Viqueque, kinta ne’e.
Notísia relevante : Profesór antigu 4.000 atu goza rejime karreira hein promulgasaun hosi Prezidente Repúblika
Aleinde ne’e, FRETILIN hakarak dezenvolvimentu globál no integradu, kria empregu, hadi’a servisu saúde no infraestrutura sira.
“Dezenvolvimentu la’o ba oin presiza infraestutura hanesan estrada no ponte inklui infraestutura setór agrikultura hanesan bee no rai. Ho planu hirak ne’e mak ami sei hadi’a edukasaun, saúde, polítika infraestura, no bee-moos tanba sidadaun hotu iha diretu asesu bee. Tanba ne’e ba oin sei kria dezenvolvimentu integradu no sustentável,” nia akresenta.
Biban ne’e, nia hato’o katak Timor-Leste presiza kadoras mai Beaço, tanba ne’e povu tenke hamutuk nune’e bainhira kadoras mai presiza haree tan akordu tratadu entre Timor-Leste ho Indonézia.
Atividade kampaña ne’e hahú tuku 10:00 to’o 14:00, ne’ebé hetan partisipasaun hosi militante no simpatizante FRETILIN hosi postu Uatulari no Uatucarbau.
Nune’e mós hetan seguransa hosi Polísia Nasionál Timor Leste (PNTL) munisípiu Viqueque no superviziona hosi Komisaun Nasionál Eleisaun (CNE, sigla portugés) inklui observadór nasionál no internasionál sira.
Jornalista : Vitorino Lopes da Costa
Editora : Julia Chatarina
