MANUFAHI, 27 abríl 2023 (TATOLI) – Komandante Polísia Nasionál Timor-Leste (PNTL) Munisípiu Manufahi Superintendente Joni Viana das Regras, louva komunidade Manufahi tanba hatudu maturidade ne’ebé di’ak hodi mantein pás no estabilidade iha tempu saida de’it.
“Parabéns ba Manufahi oan sira tanba durante semana ida resin sai ezemplár ba munisípiu seluk iha kampña maske munisípiu seluk iha konflitu maibé ita la iha, mantein nafatin imi-nia atitude sira hanesan ne’e hodi kontribui ba pás iha ne’e”, Komandante dehan ba komunidade sira iha Rotuto Same, ohin.
Nia dehan, hanesan komandante apela nafatin ba Manufahi-oan atu garante estabilidade iha munisípiu ne’e.
“Kontinua nafatin hodi lololiman ba malu. Rai ne’e ba oin, ita tenke kuda espiritu ida ne’ebé hadomi malu atu lori nasaun ne’e nia naran morin iha mundu no dezenvolvimentu bele la’o ho di’ak”, nia hatutan.
Nia rekora, iha eleisaun no kampaña tinan kotuk, Manufahi sai fatin ida di’ak tanba la akontese konflitu no hetan apresiasaun hosi observadór internasionál sira.
“Iha tinan kotuk eleisaun prezidensiál, Manufahi hanesan munisípiu ida ne’ebé the best tuir observasaun hosi observadór internasionál sira, ne’ebé ha’u hakarak ita nafatin mantein hanesan ne’e”, nia hakotu.
Jornalista: Hortencio Sanchez
Editór : Zezito Silva
