MANATUTO, 27 abríl 2023 (TATOLI)—Sekretáriu Jerál Partidu Republikanu (PR), Venâncio Sarmento, hateten PR altera kalendáriu kampaña iha kinta (27 abríl 2023) ne’e iha Soibada tanba failansu tékniku nune’e sei muda ba fali iha fulan-maiu.
“Depois ita sei halo vizita iha fulan-maiu nian no ohin ita altera tanba parte tékniku ninian, nune’e iha labele realiza ohin,” Venâncio Sarmento hateten ba Agência Tatoli liuhosi telefónika, kinta ne’e.
Sekretáriu Jerál PR ne’e esplika, aleinde tékniku tanba ekipa PR sei iha munisípiu Viqueque no ho distánsia ne’ebé dook nune’e PR hanoin altera loron ohin ne’e.
“Agora ami sei iha Viqueque no aban kontinua ba Baucau, no ida-ne’e ita haree distánsia dook nune’e ami altera tiha depois iha loron 01 mai mak ami halo revizaun ba CNE,” nia hateten.
Entretantu, Diretór Komisaun Nasionál Eleisaun (CNE) munisípiu Manatuto, Paulino Soares, hateten sira seidauk simu informasaun hosi Partidu Republikanu kona-ba alterasaun kalendáriu kampañia loron ohin nian.
“Ida-ne’e ha’u seidauk simu informasaun kona-ba Partidu Republikanu kansela, ne’ebé ami koloka tiha ona ami-nia ofisiál iha ne’ebá. Bainhira laiha koñesimentu mak ami tau iha relatóriu no iha ne’e ami mós prepara hela formuláriu hodi prienxe partidu ne’ebé mak altera no laiha koñesimentu. Maibé ida-ne’e eskritu nian, agora online ne’e ami manda kedas nune’e komisáriu sira bele asesu,” nia hateten.
Jornalista : Osória Marques
Editór : Cancio Ximenes
