Bainhira kaer ukun, PUDD sei fo prioridade ba agrikultura-edukasaun
COVALIMA, 27 abríl 2023 (TATOLI)–Prezidente Paridu Unidade Dezenvolvimentu Demokrátiku (PUDD), Silvestre Sufa, hateten bainhira iha eleisaun parlamentár ne’e povu fó konfiansa kaer ukun mak PUDD sei fó prióridade ba programa agrikultura no edukasaun bainhira povu fó fiar ba PUDD hodi kaer ukun.
Notísia Relevante: PUDD fó prioridade hadi’a irrigasaun iha Manatuto
“Covalima fatin ne’ebé riku, iha auto estrada, entaun joven tenke iha kualidade liuhosi fó formasaun ba joven-sira, nune’e ita-boot sira iha kualidade abilidade edukasaun sufisiénte bele kompete iha merkadu traballu no programa agrikulta,” Silvestre Sufa hato’o promesa ne’e bainhira hala’o kampaña ho tipu komísiu iha Kampu Futeból Ladi, Covalima, kinta ne’e.
Partidu ho númeru sorteiu ualu (8) ne’e bainhira povu fó konfiansa mak fó prioridade ba programa agrikultura liu-liu oinsá atu kuda ai-farina iha to’os ba agtrikultór sira, tanba ai-farina ne’ehanesan materiál báziku atu prodús sai serveja.
Aleinde programa agrikultura, nia dehan, sei fó prioridade mós ba área peska, estabelese grupu koperativa pekuaria oinsá haki’ak karau iha munisípiu Covalima.
“Ita-boot sira riku maibé falta jestaun. Tasi haleu Covalima maibé ita-boot sira buka ikan tuir ita-boot sira-nia esperiénsia pesoál laiha formasaun, fasilidade sosa roo hodi hasa’e kualidade peska, nune’e Timor la presiza Esporta ikan hosi rai-li’ur,” nia dehan.
Tuir loloos Governu sosa ró tanba gasta osan ba viajen estranjeiru makaas no bainhira povu fó konfiansa kaer ukun mak PUDD sei hamenus atu halo viajen ba estranjeiru.
Koordenadór PUDD munisípiu Covalima, Andre de Oliveira, apela ba militante hotu iha postu administrativu hitu iha munisípiu Covalima atu servisu makaas, nuneé bele fó vitória ba PUDD iha eleisaun parlamentár iha 21 maiu 2023.
“Ha’u apela ba estrutura postu hitu, iha momentu ida-ne’e hakarak mós apela ba militante sira atu servisu makaas, nue’e bele fó vitória ba partidu liuhosi votu ne’ebé ho kualidade tebes,” nia dehan.
Ativade kampaña ne’e hetan seguransa másimu hosi Polísia Nasionál Timor-Leste no observa hosi Komisaun Nasionál Eleisaun (CNE-sigla portugés).
Notísia Relevante: PUDD kompromete tau prioridade ba área peska
Jornalista : Celestina Teles
Editór : Cancio Ximenes
