PR Horta apoiu $2000 ba Letícia Soares loke kioske
DILI, 27 abríl 2023 (TATOLI)- Prezidénsia Repúblika (PR), kinta (27 abríl 2023) ne’e, hodi Prezidente Repúblika, José Ramos Horta, nia naran fó apoiu orsamentu ho montante $2000 hanesan ejstu domin ba Letícia Soares Gonçalves hodi hala’o negósiu liuhosi loke kioske.
“Ita-nia Prezidente tau matan ba bei-oan Letícia hanesan jestu domin, sentidu umanu no karizma domin ne’e forte tebes, tanba Letícia ho korajen no buka dalan hodi to’o iha Palásiu Prezidénsia hasoru avó Horta, no ikus mais hetan naroman hotu hodi tulun ninia pasu hakat ba oin,” Xefe Kaza Sívil Prezidénsia Repúblika, Bendito Freitas, hateten bainhira entrega kioske refere iha Manleuana, Dili, kinta ne’e.
Nia hatutan, apoiu orsamentu ne’e ki’ik maibé hosi sasán ne’ebe nia faan foin semana rua hetan nia funan $200, entaun ho ida-ne’e sei metin di’ak liután.
“Ita-boot idade ne’ebé sei kiik, kioske ida-ne’e hanesan banku ida no la’o neineik osan refere sei apoiu ita to’o universidade. Dalan ne’ebe ita -boot hili ba aban bainrua sei di’ak liu,” Xefe Kaza Sívil fó korajen ba labarik ne’e.
Nia hateten, inia prezensa iha entrega kioske ne’e reprezenta Prezidente Repúblika, José Ramos Horta ho dirasaun sosiedade sivíl no Prezidénsia la’ós hanesan ezekutivu ne’ebé iha orsamentu boot responde buat hotu.
Maibé, tuir nia, Prezidénsia Repúblika haree tuir kbi’it finanseiru hodi responde saida mak iha hodi apoiu hanesan iha programa nutrisaun ne’ebé fó han labarik sira inklui inan isin-rua no programa sira seluk tán.
Bia parabeniza Letícia no husu atu halo jestaun di’ak, nune’e bele sai susesu no hosi parte Xefe Kaza Sívil sei hato’o ba Xefe Estadu iha tempu tuir mai bele hasoru malu ho Prezidente Repúblika, José Ramos Horta.
Benefisiária Letícia Soares Gonçalves hato’o agradesimentu ba grupu filmaker no Prezidente Repúblika José Ramos Horta ho ekipa Prezidénsia Repúblika ne’ebé apoia ninia atividade sira-ne’e.
“Ha’u-nia agradesimentu ba grupu voluntáriu filmaker New Jeneration ne’ebé promove ha’u liu-hosi filmajen badak faan kripik iha aredór Universidade da Páz (UNPAZ), tanba sira mak ohin ha’u hetan tulun ida-ne’e. Ha’u hato’o mós agaradesimentu ba Prezidente Repúblika nia apoiu osan hodi loke kioske ne’e atu hatutan moris,” nia dehan.
Jornalista : Nelson de Sousa
Editór : Cancio Ximenes
