Profesór kontratadu 94 asina ona kontratu iha edukasaun Covalima
COVALIMA, 27 abríl 2023 (TATOLI)–Diretór Servisu Edukasaun Munisípiu Covalima, Rui Amarál Suri Seran, hateten profesór na’in-94 iha Covalima hosi professor kontratadu 1.715 iha territóriu nasionál ne’e, Ministériu Edukasaun Juventude no Desportu (SEJD) fó sai sira-nia naran iha Jornal Repúblika asina ona sira-nia kontratu iha Servisu Edukasaun Munisípiu Covalima.
Notísia Relevante: MEJD adia prosesu asina kontratu ba profesór kontratadu 1.715
“Ita-nia Profesór na’in-94 asina ona sira-nia kontratu iha loron 10 fulan-abríl tinan 2023 iha Servisu edukasaun Munisípiu Covalima,” Diretór Servisu Edukasaun Munisípiu Covalima, Rui Amarál Suri Seran, hateten bia informa ba Agência Tatoli, iha nia kna’ar fatin, Santa Rosa k inta ne’e.
Maske profesór na’in-94 asina ona sira-nia kontratu maibé iha kontratu laran ne’e la hakerek durasaun kontratu ba profesór sira, maibe sira asina de’it profesór sira rasik la hatene sira nia kontratu bainhira mak remata no atu asina fali.
“Durante profesór sira asina kontratu ne’e, ami mos simu preokupasaun hosi profesór sira kona-ba sira-nia, tanba iha kontratu la hakerek durasaun kontratu ba profesór sira maibé hosi parte edukasaun labele resposta kona-ba profesór sira-nia preokupasaun,” nia dehan.
Antes ne’e, atu fó sai profesór sira-nia naran iha Jornal Repúblika profesór na’in-256 mak submete sira-nia dokumentu ba Servisu Edukasaun Munisípiu Covalima ne’ebé prosesu la tuir teste.
Bazea ba kritéria hosi juri, sira sei haree ba profesór sira-nia durasaun servisu ne’ebé hahú hanorin iha tinan 2007-2017, ba sira-ne’ebé mak hanorin iha hahú 2018 entaun pasiénsia hein tempu seluk maibé haree mós nesesidade ba eskola nian.
Notísia Relevante:
Jornalista : Celestina Teles
Editór : Cancio Ximenes
