DILI, 27 abríl 2023 (TATOLI) – Prezidente Partido Congresso Nacional de Reconstrucão de Timor-Leste (CNRT, sigla portugés), Kay Rala Xanana Gusmão, hato’o felisitasaun ba Padre Leandro Maria Alves ne’ebé hetan ona nomeasaun hosi Papa Francisco hodi sai nu’udar Bispu Timor-Leste ba Dioseze Baucau nian.
Portavós no Koordenadór Polítika Esterna Partidu CNRT, Roberto Soares, hatete CNRT hamutuk ho estrutura tomak, inklui militante no simpatizante no povu Timor-Leste ein jerál hato’o parabéns ba Padre Leandro ba responsabilidade foun nu’udar bispu Baucau.
“Ha’u hakarak hato’o iha momentu ida ne’e, lori maun boot Kay Rala Xanana Gusmão ninia felisitasaun ba istória foun ida tan ne’ebé Timor-Leste hetan liuhosi nomeasaun sua Santidade Papa Francisco fó ona ba reverendísimu Padre Leandro Maria Alves hodi sai Bispu foun ba Dioseze Baucau”, dehan Koordenadór Polítika Esterna iha konferénsia imprensa ne’ebé hala’o iha sede CNRT iha Bairro dos Grilhos, kinta ne’e.
Nia salienta katak prezidente partidu CNRT hamutuk ho estrutura tomak no militante sira simu notísia ida ne’e ho laran haksolok tebes tanba Padre Leandro hetan ona fiar hosi Papa Francisco.
“Ita-nian prezidente partidu kontente tebes no hato’o nia apoiu tomak ba reverendísimu amu Leandro ne’ebé nomeadu ona ba Bispu foun Timór nian hodi tau-matan ba Dioseze Baukau atubele hala’o di’ak liután ninia knaar iha rai-lulik Timór ne’ebé ita hotu hadomi”, Roberto Soares haktuir.
Rekorde katak nomeasaun Vatikanu ba Padre Leandro Alves nu’udar bispu foun ne’e anunsia husi Prezidente Konferénsia Episkopál Timorense (CET, sigla portugés), Virgílio Cardeal do Carmo da Silva, liuhusi konferénsia imprensa ne’ebé organiza husi Arkidioseze Metropolitana Dili, iha salaun Arkidioseze Lecidere, Dili, kuarta ne’e.
Sekretáriu-Ezekutivu CET ne’e nomeadu husi Santa Sé hodi substitui Dom Basílio do Nascimento ne’ebé lakon vida iha tinan kotuk.
Notísia relevante: Biografia Pe. Leandro Maria Alves, Bispu foun dioseze Baucau
Jornalista: Tomé Amado
Editora: Maria Auxiliadora
