Aldeia 40-resin iha Manatuto seidauk asesu bee-moos
MANATUTIO, 28 abríl 2023 (TATOLI)—Administradór Munisípiu Manatuto, Bernardo Lopes, hateten maske Governu liuhosi Programa Nasionál Dezenvolvimentu Suku (PNDS) dada bee-moos ba komunidade maibé to’o agora populasaun iha aldeia 40-resin iha Manatuto seidauk asesu bee-moos.
“Tanba problema bee-moos sai problema ida-ne’ebé la’o namanas hela maibé bee-moos liuhosi Programa Nasionál Dezenvolvimentu Suku kontinua dada bee-moos besik komunidade. Maibé, to’o agora ita iha aldeia 40-resin seidauk asesu no 60-resin mak asesu ona,” Bernardo Lopes hateten Tatoli, iha ninia kna’ar fatin, foin lalais ne’e.
Populasaun ne’ebé seidauk asesu bee-moos neé, nia dehan, populasaun sira-ne’ebé hela iha aldeia ne’ebé rurál tebes.
Maibé, tuir nia, tinan oin Programa Nasionál Dezenvolvimentu Suku (PNDS) sei to’o iha ne’ebá no dada besik tan bee-moos ba populasaun sira.
“Ba sira-ne’ebé mak seidauk asesu bee-moos ne’e, PNDS kontinua dada tanba programa ne’e programa anuál ne’ebé iha nia kontinuasaun to’o povu asesu hotu bee-moos,” nia hateten.
Totál populasaun Manatuto hamutuk 50.989 ne’ebé hela iha postu administrativu neen (6) mak postu administrativu Manatuto Vila, Laleia, Soibada, Laclo, Laclubar no Barique, ho suku hamutuk 31 no aldeia hamutuk 06.
Jornalista : Osória Marques
Editór : Cancio Ximenes
