AILEU, 28 abríl 2023 (TATOLI) – Prezidente Komisaun Nasionál Eleisaun (CNE, sigla portugés) no Embaixadór Japaun iha Timor-Leste Tetsuya Kimura ne’ebé akompaña hosi responsavél Programa Nasaun Unidas ba Dezenvolvimentu (PNUD) iha Timor-Leste Munkhtuya Altangere inklui Autoridade Munisípiu Aileu, inagura edifísiu CNE ho objetivu atu fasilita servisu orgaun eleitór iha nivél munisípiu ho di’ak liután.
Konstrusaun edifísiu CNE iha Munisipiu Aileu ho valór osamentu $140.7000, ne’ebé finansia direta hosi Governu Japaun através Programa Nasaun Unidas ba Dezenvolvimentu (PNUD) liuhosi projetu eleisaun rejilente iha ba Covid-19 iha Timor-Leste (CORE- TL).
Konstrusaun ba edifísiu CNE hahú iha inísiu dezembru 2023 ne’ebé mak ka’er hosi kompañia lokál ho naran Biamali Uni Pessoal Lda. ho kontratu duransaun fulan neen. Maibé parte kompañia rasik finaliza obra ne’e ho de’it fulan haat nia-laran.
Hafoin kompañia konklui tiha obra refere, iha sesta (28/4) ne’e, Embaixadór Japaun iha TL Tetsuya Kimura hamutuk Prezidente Komisaun Nasionál Eleisaun José Belo ne’ebé akompaña hosi Adjuntu Administradór Munisípiu Aileu inklui autoriedade sira halo kedan inagurasaun ba edifísiu CNE Munisípiu Aileu ne’e.
Hafoin serimónia entrega, Prezidente CNE José Pereira Belo, hateten ho edifísiu ida ne’e bele fasilita liután servisu pesoál CNE iha munisipiu atu bele organiza eleisaun iha nivél munisipiu bele lao di’ak liután no bele presta servisu ne’ebé di’ak ba komunidade iha Munisípiu Aileu rasik.
“Tanba ita-hatene eleisaun ne’e kada tinan lima dala ida, atu fó biban ba pesoál CNE sira atu organiza eleisaun iha nivél nasionál no munisípiu ho transparante ba ema hotu, entaun ita presiza mós fatin ida ne’ebé di’ak hodi funsionáriu CNE servisu ho di’ak, atu ita diskute kona-ba futuru ita-nia nasaun no futuru demókrasia ba ita-nia nasaun”, José Belo iha nia intervensaun durante serimónia inagurasaun edifísiu CNE Munisipiu Aileu ne’ebé halao iha Suku Aissirimou, Postu Administrativu Aileu Vila, Munisípiu Aileu.
Nia husu ba Aileu oan hotu atu kuidadu tau matan ba edifísiu ida ne’e atu fasilita pesoál CNE bele halo servisu ho di’ak liután iha futuru.
José Belo mós agradese ba Governu Japaun no PNUD tanba apoia makas Governu Timor-Leste liuhosi CNE oinsa atu tulun eleisaun bele lao di’ak.
“Ita agradese ba Governu Japaun tanba durante ne’e sai ona parseiru ne’ebé di’ak tebes ba Timor-Leste, apoia prosesu eleisaun iha Timor-Leste. Japaun la’os apoiu de’it CNE hodi konstrui edifísiu CNE nian iha munisipiu Aileu de’it. Maibé apoia ona buat barak ba ita dezde hahú hosi independénsia Timor-Leste to’o ohin loron kontinua apoia ita. Ita labele taka matan ba ida ne’”, nia kongratula.
Iha biban ne’e, lider CNE ne’e mós kongratula kompañia lokál ne’ebé konstrui edifísiu CNE iha ne’ebé hatudu kualidade ne’ebé di’ak no finaliza tuir tempu molok tama ba loron eleisaun parlamentár.
Iha fatin hanesan, Emabaixadór Japaun iha Timor-Leste Tetsuya Kimura, hateten Japaun kompremetidu kontinua hametin kooperasaun ho Governu Timor-Leste hodi apoia CNE ba eleisaun iha TL la’o di’ak.
Diplomata Japanes ne’e mós husu ba CNE atu aproveita edifísiu ne’e ba implementasaun eleisaun iha futuru.
Iha biban ne’e, Embaixadór Japaun iha Timor-Leste Tetsuya Kimura mós louva dezenvolvimentu ne’ebé mak la’o iha Timor-Leste durante tinan 20, hatudu progresu barak iha aspetu barak inklui prosesu demokratizaun ne’ebé mak lao di’ak tebes iha Timor-Leste durante ne’e.
Nune’e mós, responsavél Programa Nasaun Unidas ba Dezenvolvimentu (PNUD) iha Timor-Leste, Munkhtuya Altangere, reforsa PNUD kontinua hato’o nia prontidaun atu apoia CNE hodi hamutuk organiza eleisaun iha TL bele la’o di’ak.
“PNUD kontinua fó apoiu ba promosaun eleisaun inkluziva no informativa iha Timor-Leste atu la husik ema ida iha kotuk”, nia subliña.
Nia hatutan, Governu Japaun liuhosi PNUD kontinua tulun CNE hodi konstrui edifísiu CNE iha munisípiu sira iha futuru..
“Agora daudaun ami hahú konstrui edifísiu CNE iha Aileu, Viqueque no Covalima, ami promete liuhosi kooperasaun ne’e sei konstrui edifísiu CNE iha munisipiu sira”, Munkhtuya Altangere, dehan.
Edifísiu CNE iha Munisípiu Aileu kompleta ho fasilidade eskritóriu ba funionáriu CNE atu halo servisu loroloron, iha mós fatin ba asesibilidade ema ho difisiénsia fízika bainhira atu trata dokumentu ruma iha edifísiu ne’e no iha salaun ne’ebé hanaran Salaun Resorisaun Aissirimou tanba Aissirimou fatin istóriku ba luta libertasaun nasionál.
Jornalista: Natalino Costa
Editór : Zezito Silva
