Médiku iha Manatuto halo tratamentu movél iha sentru-postu saúde
MANATUTO, 28 abríl 2023 (TATOLI)—Administradór Munisípiu Manatuto, Bernardo Lopes, hateten, médiku sira iha munisípiu Manatuto halo de’it tratamentu movél iha sentru saúde no postu saúde sira hotu iha Manatuto tanba médiku la to’o.
“Doutór iha fasilidade saúde Manatuto halo tratamentu movél tanba médiku la to’o hodi koloka ba kada sentru iha postu saíude sira. Ita sei la tau médiku permanente iha fatin ida tanba bainhira tau ba postu saúde ida mak seluk sei la hetan. Tanba ne’e. Médiku sira halo tratamentu movél de’it, nune’e bele kobre hotu sentru saúde no postu saúde iha territóriu Manatuto nian,” nia hateten ba Agência Tatoli, foin lalais ne’e.
Tuir nia, médiku iha 59 mak na’in-28 ba halo estudu espesialista nian iha Cuba no Fiji, nune’e daudaun ne’e hela de’it médiku na’in-31 mak hala’o kna’ar iha Manatuto.
“Iha tinan kotuk, mediku hamutuk 59 kompostu hosi mane 40 no feto 19. Entaun, hosi 59 ne’e médiku ne’ebé sai ne’e 28 no agora ativu ne’e ita hela 31. Hosi ne’e mak fahe la sufisiente nune’e médiku sira tenke halo tratamentu movél,” nia dehan.
Nia dehan, pessoal saúde iha Manatuto hamutuk 208 ne’ebé kompostu hosi enfermeira iha 70 ho mane ema na’in-53 no feto iha na’in-17 no mós parteira iha na’in-41.
Ba analista iha Servisu Saúde Manatuto nian ne’e hamutuk na’in-18 ne’ebé kompostu hosi mane na’in-15 no feto iha na’in-tolu (3), farmásia hamutuk 31 ho mane 18 no feto 13 no parte radiologia nian iha mane ida (1).
“Maibé, saúde públika ita iha 16 no ita mós dentista hamutuk na’in-hitu (7) ne’ebé kompostu hosi mane na’in-haat (4) no feto na’in-tolu (3),” nia hateten.
Tuir nia, iha munisípiu Manatuto ne’e iha postu saúde hamutuk 15 no sentru saúde iha neen (6)..
“Ita sei falta de’it koloka posto de tratamento iha aldeia, tanba dala barak ita-nia komunidade tenke la’o hosi aldeia to’o postu saúde sira, nune’e presiza duni postu saúde. Tanba, ita iha de’it postu saúde 15,” nia hateten.
Jornalista : Osória Marques
Editór : Cancio Ximenes
