OMS: Kampaña imunizasaun integrada atinje 95%

DILI, 28 abril 2023 (TATOLI) – Reprezentante Organizasaun Mundiál Saúde iha Timor-Leste, Arvind Mathur, informa kampaña imunizasaun integrada hetan susesu boot no atinje 95% iha teritóriu nasionál

“Implementasaun kampaña imunizasaun integrada ida ne’e hetan susesu boot, ho kada munisípiu atinje kobertura liu 95% iha fulan marsu nia-laran, ida ne’e atinjimentu boot ida bainhira ita haree ba dezafiu ne’ebé iha ho pandemia Covid-19 la’o hela maibé Ministériu Saúde no OMS servisu hamutuk ho parseiru sira seluk atu asegura vasina no intervensaun sira to’o ba labarik sira ho susesu”, Arvind Mathur informa ba TATOLI via media sosiál, ohin.

Nia dehan, kampaña ne’e atinje ninian alvu kobertura liu 95% iha munisípiu hotuhotu ba vasina Sarampu Rubela (MR), Vasina Polio Oral (OPV), Vasina Pneumokoku (PCV), Suplementasaun Vitamin A, tableta kombate lumbriga ba labarik ho idade menus husi tinan lima mai kraik.

“Kobertura aas ne’e hanesan sinál enkorajamentu ba programa imunizasaun Timor-Leste no ninia esforsu atu hadia saúde no bein-estar ba labarik sira”, nia informa.

Nia hateten, OMS oras ne’e apoia hela Ministériu Saúde atu avalia kobertura ne’e ho tulun husi survey ne’ebé hala’o husi pesoál saúde iha terrenu. Ida ne’e mós nu’udar dahuluk ne’ebé kobertura Programa Imunizasaun Expandidu (EPI) hala’o ho dijitál liuhosi uza tableta no uza Sistema Informasaun Saúde Timor-Leste (TLHIS) atu dokumenta dadus. Rezultadu husi survey ida ne’e sei tulun atu hatene loloos kobertura kampaña integradu ne’e sukat ona ho akurasia ka lae.

OMS iha ninia papél esensiál iha susesu kampaña imunizasaun ida ne’e liuhosi fó asisténsia téknika no suporta operasionál ba Ministériu Saúde.

“Ami hamutuk ho Ministériu Saúde planeia no implementa kampaña, fó treinamentu ba pesoál saúde kona-ba oinsá fó vasina no jestaun refrijeradór (cold chain) no halo monitorizasaun no supervizaun”, nia afirma.

OMS mós emprega asesór internasionál iha kada munisípiu atu haforsa programa imunizasaun iha baze. No suporta téknika mós fó husi OMS atu dezenvolve no implementa instrumentu jestaun dadus iha TLHIS no atu analiza no prodúz kobertura infográfika kada loron.

Atu asegura katak labarik idak-idak hetan vasinasaun, Ministériu Saúde tenke foku ba haforsa servisu imunizasaun rutina no rezolve dezafiu hirak ne’ebé iha atu atinje labarik sira iha fatin ne’ebé susar atu to’o ba. Ida ne’e inklui hadia korrente jestaun abastesimentu vasina, hasae envolvimentu komunidade no empodera kapasidade kna’ar na’in saúde sira. Ministériu tenke  prioritiza integrasaun servisu imunizasaun ho intervensaun saúde seluk, hanesan nutrisaun no kombate lumbriga, atu masimiza impaktu ba labarik nian saúde.

“Ha’u nian mensajen prinsipál ba Semana Mundiál Imunizasaun katak vasina ne’e instrumentu importante atu proteje saúde no bein-estar individu no komunidade nian mak imunizasaun la’os deit prevene moras no dizabilidade maibé mós kontribui ba redusaun ki’ak no dezenvolvimentu ekónomiku. Importante ita servisu hamutuk atu asegura katak labarik hotu-hotu asesu ba vasina ne’ebé bele salva moris no programa imunizasaun kontinua no garante nia sustentabilidade atu to’o ka kobre ba sira ne’ebé presiza liu.  Tanba ne’e  ami kontinua promove  benefísiu imunizasaun no enkoraja ema hotu-hotu atu hetan vasina iha fasilidade saúde sira hotu iha Timor Leste,”Nia konklui.

Tuir dadus husi Ministériu Saúde katak iha loron 27 marsu 2023  resultadu  finál ba kampaña nasionál integradu  ba labarik idade tinan lima mai kraik  husi vasina  OPV  atinji ona 106.2%, PCV 105.9%, sarampu no rubella 102.6%, Vitamina A 102.6%, no albendazole 102.7%

Jornalista : Felicidade Ximenes

Editór : Zezito Silva