iklan

ELEISAUN, LIQUIÇÁ, MUNISÍPIU, POLÍTIKA

PDC promete kapasita F-FDTL no PNTL  asegura rikusoin iha tasi Timor

PDC promete kapasita F-FDTL no PNTL  asegura rikusoin iha tasi Timor

Prezidente PDC, Francisco de Araújo, ho estrutura hala’o atividade kampaña eleitorál iha munisípiu Liquiça. Imajen/Cidalia Fátima

LIQUIÇA, 28 abríl 2023 (TATOLI)- Partidu Democráta Cristão (PDC), sesta ne’e,  kontinua hala’o atividade kampaña eleitorál iha Munisípiu Liquiça ho nia komprimisiu sei hasa’e kapasidade Seguransa Marítima, nune’e bele asegura rikusoin iha tasi Timor.

Prezidente PDC, Francisco de Araújo ba militante no simparizante hateten programa prioridade kampaña eleitorál iha Liquiça sei foku ba defeza, seguransa no peska.

“Ita hakarak moderniza setór Defeza hanesan Forsa Defeza Timor-Leste hodi kontinua sosa ekipamentu hanesan sosa ró funu rua no aviaun rua, hodi halo kontrola ba rikusoin iha tasi Timor. Ita hakarak kria kondisaun tanba durante ne’e sira nia ekipamentu la kompletu,” Prezidente PDC esplika hafoin hala’o diálogu komunitariu iha Loes, Maubara, ohin.

Nia hateten ró ida atu halo kontrolu iha tasi mane no ida halo kontrolu ba iha tasi feto hodi prevene peskas ilegál. Nune’e mós kontinua sosa ekipamentu militár ho modernu inklui rekrutamentu ba F-FDTL, no oferese bolsa estudu ba ofisiál sira hodi hasa’e koiñesimentu iha área Aero, Tereste, no Maritima.

PDC mós hakarak moderniza setór seguransa hanesan PNTL liuhosi sosa ró rua no aviaun rua, oferese ba PNTL hodi halo kontrolu ba rikusoi tasi nian liu husi Polisia Maritima.

Francisco de Araújo afirma bainhira seguransa marítima bele kontrola  ho diak mak sei kontinua sosa ekipamentu peska nia hodi entrega ba peskador.

“Fo subsídiu ba peskador hodi motiva sira loke fábrika rasik, hodi redus importasaun husi rai liur,” Nia esplika.

Hodi desenvolve setor peska ba oin, PDC sei motiva emprezáriu Timor-oan hodi halo investimentu hanesan loke fabrika iha Timor-Leste, nune’e bele oferese oportunidade servisu ba Timor oan.

Tuir observasaun Tatoli nian iha tereñu, kampaña eleitoral husi Partidu PDC ne’ebé hala’o iha sexta ne’e hahu kedas husi vizita negosiante iha Meekadu Munisipál Liquiça no kontinua ba fatin han Loes, Maubara hodi halo dialogu no fahe brosura.

Kampaña Eleitorál ne’e rasik hetan seguransa masimu husi Polísia Nasionál Timor-Leste (PNTL) inklui observador sira hanesan CNE, RENETIL no seluk tan.

Jornalista : Cidalia Fátima

Editór        : Florencio Miranda Ximenes

iklan
iklan

Leave a Reply

iklan
error: Content is protected !!