PLP: Manufahi sei sai hanesan polu ba dezenvolvimentu Timor-Leste
MANUFAHI, 28 abríl 2023 (TATOLI) – Prezidente Partidu Libertasaun Popular (PLP) ho númeru sorteiu 3, Taur Matan Ruak bainhira hala’o kampaña polítika ho tipu komísiu iha Munisípiu Manufahi promote, munisípiu ne’e sei sai hanesan ‘polu’ dezenvolvimentu Timor-Leste nian.
“Ha’u mai iha ne’e lori novidade ida ba imi Manufahi oan hotu, Manufahi sei sai hanesan ‘polu’ dezenvolvimentu Timor nian, agora daudaun ‘polu’ dezenvolvimentu ida mak Oe-Cusse, maibé tolu seluk hanesan Baucau, Malianan no Manufahi rasik ita finaliza ona estudu, karik nafatin kaer Governu ita sei kontinua halo, lori sidade mai povu la’os povu mak ba buka sidade”, Taur dehan iha Kampaña ne’ebé hala’o iha kampo futeból Same, sesta ne’e.
Nia dehan, bainhira ‘polu’ ne’e halo iha Manufahi sei fó oportunidade ba munisípiu ne’e nabilan mós hanesan Oe-Cusse ne’ebé agora daudaun ho ponte ne’ebé kualidade di’ak no aeroportu ne’ebé kualidade.
PLP nia programa importante mak fó bolsa estudu ba timoroan hotu ho tipu ne’ebé la hanesan ne’ebé dadaun ne’e la’o hela sei kontinua liután bainhira nafatin kaer ukun.
“Bolsa estudu ba kbiit laek, bola estudu parsiál, premiu ba mellór alunu, maibé ita mós hakarak loke programa ida fó kréditu ba estudante sira, estudante nia bele ba foti kréditu iha Banku, bainhira nia eskola hetan servisu nia foin bele selu fali, atu nune’e estudante sira labele fó todan ba inan aman, ida ne’e programa ida”, Taur dehan.
“Universidade sira iha Dili, se mak hakarak mai loke eskola iha munisípiu sira temi ne’e, Governu fasilita kréditu nia selu de’it osan nia inan no sei la selu funan, maibé tenke halo sala aula, uma ba professór no família sira hela no uma ba mós alunu sira bele hela”, Taur haklaken.
Nia esplika, objetivu hosi programa hirak ne’e hakarak halo mamuk Dili hodi hadia fali tanba kondisaun Dili daudaun ne’e dez-organizadu tebes.
“Ita haree, komesa hamamuk ona Dili mak Portu Dili muda ona ba Tibar, Portu Dili ne’e projetu ida ba turizmu nian, investimentu ida ho orsamentu liu millaun $100, halo apartamentu ba pasajeiru sira no buat hotu ne’ebé ligasaun ba turizmu nian”, nia hatutan.
Universidade Nasionál Timor-Lorosa’e sei muda ba Aileu, populasaun sira ne’ebé okupa iha edifísiu Ministériu Finansas nia sorin no Palásiu Prezidensiál nia sorin sei muda hotu ba Hera tanba Governu sei halo uma hamutuk 2000 atu lori populasaun sira ba hela iha ne’ebá.
“Estadu la’os halo de’it ba suku sira maibé halo mós ba Dili, karik populasaun sira iha Dili hakarak muda sai mai munisípiu, Governu bele fasilita halo uma ba-sira atu sira bele husik Dili, atu bele hadia Dili sai furak liután, Ministériu sira iha Dili laran sei muda hotu ba Metinaro, atu halo Dili sai sidade ida di’ak no furak”, nia hakotu.
Kampaña ne’e hetan observasaun direta hosi Komisaun Nasionál Eleisaun (CNE-sigla portugés), monitoriza hosi Provedoria Diretu Humanu no Justisa (PDHJ) no seguransa másimu hosi Polisia Nasionál Timor-Leste (PNTL) Munisípiu Manufahi.
Tuir oráriu ne’ebé aprova hosi CNE nasionál kampaña ba PLP aban sei kontinua halo iha Munisípiu Covalima no Ainaro.
Jornalista: Hortencio Sanchez
Editór : Zezito Silva
