Selebra “May Day”, Deputadu FRETILIN husu Governu tau matan ba traballadór
DILI, 28 abríl 2023 (TATOLI)—Deputadu hosi bankada FRETILIN iha Parlamentu Nasionál, Joaquim dos Santos, husu ba Governu atu tau matan ba kondisaun traballadór sira iha ámbitu komemorasaun loron internasionál traballadór ka “May Day” ne’ebé kada tinan komemora iha 01 maiu.
“Ha’u hanoin loron 01 fulan-maiu ne’e loron mundiál traballadór sira, ha’u husu ba traballadór hotu-hotu atu festeza sira-nia loron boot ne’e ho di’ak no Governu tuir mai presiza tau matan kondisaun ba traballadór sira liu-liu sira-nia direitu hanesan sidadaun traballadór atu ema bele respeita,” Deputadu FRETILIN ne’e hateten ba Agência Tatoli, sesta ne’e.
Tambá, nia dehan, iha Timor-Leste ne’e sidadaun barak liu kuaze 50%-resin mak sai hanesan traballadór ne’ebé balun serbisu hanesan agrikultór, peskadór, negosiante, iha setór públiku no empreza sira.
Tambá ne’e, hanoin iha Governu ne’ebé mai presiza halo reforma polítika ida hodi fó protesaun ba traballadór sira hodi sira iha kondisaun atu prodús rezultadu mós di’ak.
Aliénde ne’e, nia husu mós parte kompetente liu-liu dirasaun traballu nian atu nafatin serbisu hamutuk ho empregadór sira hodi garante nafatin direitu traballadór labele hetan violasaun tuir lei kódigu traballu.
Jornalista : Nelson de Sousa
Editór : Cancio Ximenes
