UDT hakarak buka tuir vítima sira ne’ebé seidau sira-nia estatutu
DILI, 28 abril 2023 (TATOLI)—Prezidente Partidu União Democrática Timorense (UDT) ho númeru sorteiu 7, Francisco David Xavier, promete sei buka tuir vítima ka jurista sira ne’ebé to’o agora lahatene sira-nia estatutu.
“Apela mós ba polítiku tomak ne’ebé mak agora namkari ba mós partidu seluk, por razões, por justa causa nia interesse keta haluha; karik 21 maiu, vota ba ha’u nu’udar Prezidente UDT, hodi valoriza imi-nia vítima sira ne’ebé jurista sira ne’ebé mate to’o agora Ita la hatene sira-nia estatutu,” Prezidente UDT hateten, iha konferénsia imprensa, iha sede UDT, palapasu Dili, sesta ne’e.
Programa ne’ebé sei hato’o iha dialógu Manatuto, katak, UDT sei kontinua mantein programa prioridade hanesan infraestrutura, Saúde, Edukasaun no ekonomia ne’ebé mak hato’o ona iha komunidade Ileheu.
“Apela ba povu Timór laran tomak enjerál, espesialmente, politista iha rai-laran no mós iha rai-li’ur, tempu agora festa demokrasia ne’ebé iha 21 maiu, Ita ba vota hodi, hatutan ita-nia moris iha 5 anos nia laran, imi mak sai sasin ba dezenvolvimentu, em nome UDT hakarak apela ba Juventude Timór laran tomak, no mós inan-aman sira tomak, katak maiu ita hotu-hotu garante pás no estabilidade ne’ebé mak ita hasoru iha Eleisaun Parlamentár 2023 ida ne’e” nia apela.
Sekretáriu jerál UDT, Nikson Elvio Madeira Lay hateten katak, tuir oráriu nasionál UDT sei hala’o dialógu iha suku iliheu, maibé tanba kondisaun la premite, nune’e koordenadór deside atu altera, hodi fó fali orientasaun ba kuadru munisípiu ne’ebé mak sei hala’o knaar tuirmai.
“Hakarak informa mós katak iha, loron hirak liubá ami mós halo ona alterasaun ba oráriu kampaña UDT nian ne’ebé mak hetan ona aprovasaun husi Komisaun Nasionál Eleisaun (CNE), alterasaun ne’e iha munisípiu Covalima sei hala’o iha dia 5 maiu, Munisípiu Aileu, oráriu inísiu ami konsentra dialógu ba suku sira, husi kuadru sira, husi suku, propoin ba diresaun nasionál atu altera e lori sira mai konsentra iha kapitál munisípiu Aileu” nia deklara.
Jornalista : Mirandolina Barros Soares Editór : Florêncio Ximenes
