DILI, 28 abríl 2023 (TATOLI)– Partidu União Nacional Democrática de Resistência Timorense (UNDERTIM), sesta ne’e, hala’o kampaña eleitorál iha Munisípiu Liquiça hodi promote bainhira kaer ukun sei moderniza merkadu munisipál Liquiça.
“Merkadu ida agora iha ne’e husi kedas tempu okupasaun Indonézia nian, to’o agora governu seidauk hari’i foun, nune’e karik UNDERTIM hetan fiar husi povu sei sobu tiha merkadu ne’e no hari’i fila-fali merkadu ida ne’ebé modern. Nune’e negosiante sira bele hala’o negósiu ho dia’k,” Prezidente Partidu UNDERTIM, Francisco Guterres Mano Bui, hato’o promesa ne’e durante hala’o diálogu ho militante no simpatizante iha Merkadu Munisipál Liquiça, ohin.
Iha ámbitu diálogu ne’e, Prezidente Partidu ne’e fi’ar iha futuru sei hamosu plataforma ba unidade nasionál, nune’e bele iha asaun ba hamosu dezentralizasaun, nune’e osan bele konsentra ba kada munisípiu liuliu ba Liquiça hodi dezenvolve no moderniza merkadu ne’e.
“Ita hare’e Liquiça iha nia produtu ai-fuan oinoin, maibé ladun dezenvolve, ita hakarak transforma produtu sira ne’e ba indústria. Tanba Liquiça besik liu ba pontu entrada hanesan Portu Tibar. Ita sei lori produtu sira ne’e bá merkadu internasional,” Nia afirma.
Prezidente Partidu UNDERTIM nota katak tinan 20 ona povu seidauk sente dezenvolvimentu ne’ebé loloos, nune’e UNDERTIM mai hodi hamutuk ho povu no hamriik iha ain fatin tanba agora la tempu ona hodi defende nafatin ba produtu husi nasaun liur.
Iha fatin hanesan, Koordenador UNDERTIM Munisípiu Liquiça, Agostinha dos Santos “Moris Mesak”, reforsa, UNDERTIM hakarak mai partilla informasaun ba komunidade sira hodi hamutuk hili númeru 10 iha Eleisaun Parlamentar mai.
“Ita hare’e iha merkadu ne’e sanitasaun mós laiha, ami rona husi komunidade sira kontinua halerik tanba pesoál saúde ladun di’ak no ida ne’e karik povu fó fiar mai UNDERTIM mak sei hamutuk hadi’a ida ne’e,” Agustinha dos Santos hateten.
Tuir observasaun Jornalista Agência TATOLI,I.P nian iha tereñu nota katak kampaña eleitorál husi Partidu UNDERTIM ne’ebé hala’o iha Merkadu Munisipál Liquiça hetan seguransa másimu husi Polísia Nasionál Timor-Leste (PNTL) inklui observador sira hanesan CNE, RENETIL no seluk tan.
Jornalista : Cidalia Fátima
Editór: Florencio Miranda Ximenes
